Salón de Actos do HULA
O vicerreitor de Organización Académica e Campus de Lugo, Francisco Fraga, abre este martes, ás 9.30 horas, un foro sobre enfermaría que cita máis de 300 participantes no Hospital Universitario Lucus Augusti (HULA)
As XXVII Xornadas da Escola Universitaria de Enfermaría do Campus de Lugo da USC botan a andar este martes, a partir das 9.30 horas, no Salón de Actos do Hospital Universitario Lucus Augusti (HULA) baixo o lema ‘Usuarios e profesionais traballando xuntos’. O vicerreitor de Organización Académica e Campus de Lugo, Francisco Fraga, intervirá na apertura deste foro, que reúne máis de 300 participantes durante dúas xornadas, no marco dunha sesión inaugural na que tamén participarán o xerente da área sanitaria de Lugo, A Mariña e Monforte de Lemos, Ramón Ares; a directora Xeral de Planificación e Reforma Sanitaria do Sergas, Sofía López Linares; a directora da Escola Universitaria de Enfermaría de Lugo, Pilar Penela Puga; a directora de Enfermaría da área sanitaria de Lugo, A Mariña e Monforte de Lemos, María Jesús Pérez Taboada, e a presidenta do Colexio de Enfermaría de Lugo, Lourdes Bermello.
O enfermeiro da área de xestión de coidados do Hospital Rexional Universitario de Málaga Jesús Bujalance Hoyos abrirá a palestra de intervencións deste foro cun relatorio baixo o título ‘Revolucionando o coidado: Innovación e evidencia como motores do cambio en Enfermaría’.
O progama das XXVII Xornadas da Escola Universitaria de Enfermaría de Lugo ofrecerán ata as 14.00 horas do mércores 10 de abril un amplo abano de relatorios e mesas de debate nas que os distintos relatores tratarán cuestións relacionadas coa prestación dos coidados e coa evolución que se está a experimentar no ámbito da enfermaría.