A Sociedade de Estudios Kantianos en Lingua Española (SEKLE) desenvolve a vindeira semana na Facultade compostelá de Filosofía, entre os días 15 e 19, a sexta edición do seu Congreso Internacional, que ademais coincide co encontro bienal desta Sociedade e co tricentenario do nacemento de Immanuel Kant (1724-1804).
O lema 'Camiños do pensar' evoca metaforicamente tanto o Camiño de Santiago e a cidade anfitrioa, como os múltiples camiños abertos polo pensar kantiano a tres séculos do seu nacemento. A entidade organizadora considera a historia evolutiva do seu pensamento, que percorre varios camiños. De feito, apelan á etimoloxía da palabra 'camiño', que suxire o problema do método ou dos métodos do pensamento de Kant e mesmo o da Dedución transcendental das categorías.
Entre as persoas que participan como conferenciantes figuran Ileana Beade, da Universidade Nacional del Rosario e CONICET; Dulce María Granja Castro, da Autónoma Metropolitana-Iztapalapa; o profresor emérito Bernd Dörflinger, da Universidade de Trier; Heiner Klemme, da de Halle-Wittemberg; Laura Anna Macor, da Universidade de Verona; Jorge Pérez de Tudela Velasco, da Autónoma de Madrid; e Rogelio Rovira, da Complutense.