O evento pretende crear un diálogo multidisciplinar e dar voz a todas as xeracións da comunidade investigadora, expoñendo os retos aos que se enfrontan na actualidade
Xerar un espazo de reflexión sobre a investigación na comunidade científica española, abordar a súa divulgación e crear un diálogo multidisciplinar e interxeracional son algúns dos obxectivos da xornada da Academia Joven de España que se desenvolve o venres 25 de outubro no Paraninfo da USC, na Facultade de Xeografía e Historia, baixo o lema ‘Os camiño da investigación’.
O encontro será inaugurado ás 9.30 horas polo decano da Facultade, Marco García Quintela, xunto coa secretaria xeral de Investigación do Ministerio de Ciencia, Innovación e Universidades, Eva Ortega; o conselleiro de Educación, Ciencia, Universidades e FP, Román Rodríguez; e o presidente da Academia Joven de España, Óscar Lucía.
Examinar as diferentes realidades e estudar como ofrecer respostas á sociedade desde múltiples perspectivas son algúns dos temas que se tratarán na xornada, que analizará a ciencia e a investigación desde unha óptica diferente, poñendo o foco en temas e disciplinas pouco coñecidos para concienciar a sociedade da súa existencia, os seus desafíos e os grandes desenvolvementos realizados en cada unha desas áreas.
O evento conta coa presenza de persoal investigador vinculado ás disciplinas científicas de ciencias formais, naturais, humanas e sociais, como o director científico do CiTIUS da USC, Senén Barro, que falará da intelixencia artificial e as súas múltiples aplicacións; a catedrática de Astrofísica da Universidade da Coruña Minia Manteiga, coa conferencia ‘Chegar ao espazo’ ou a investigadora Sandra Lozano da Universidade Pompeu Fabra, que abordará a unión de historia, arqueoloxía e gastronomía en elBulliFoundation de Ferran Adrià.
Na primeira das seccións da xornada abordaranse os camiños alternativos ou complementarios á academia, tratarase sobre como crear unha empresa desde o ámbito universitario e temas como a diplomacia e a divulgación científica. Na segunda parte daráselles voz a aqueles sectores da poboación que atopan máis “pedras no camiño” á hora de buscar facer unha carreira científica. A terceira parte mergúllase en avances tecnolóxicos e científicos e a última sesión será unha mesa redonda na que participará persoal investigador de distintos centros que dialogarán con membros do programa de mentorización da Academia Joven, debatendo sobre as cuestións que máis preocupan á comunidade investigadora nova.