O persoal investigador presentará os proxectos nos que traballa e a xornada servirá tamén para fomentar a colaboración entre o mundo académico e o empresarial
O Instituto de Materiais da USC (iMATUS) conmemora este mércores 6 de novembro o Día Mundial dos Materiais co II Workshop de investigadores/as posdoutorais da USC, que reunirá persoal investigador de diversas áreas do coñecemento e representantes de empresas e institucións con vocación innovadora. O evento comeza ás 10.00 da mañá na sede do iMATUS e pola tarde terá lugar a xornada de colaboración iMATUS-empresa, tras a inauguración oficial ás 15.30 horas, que presidirá a vicerreitora de Política Científica Pilar Bermejo.
A iniciativa xorde tras o éxito do primeiro encontro de persoal investigador do programa Ramón y Cajal celebrado no iMATUS, que demostrou a necesidade dun espazo de encontro para que este persoal comparta os seus coñecementos e inquietudes. Nesta ocasión, a convocatoria amplíase para incluír investigadoras e investigadores de todas as áreas da USC.
Ademais do encontro centrado no persoal investigador, o iMATUS organizou a continuación un evento para fomentar a colaboración entre o mundo académico e o empresarial.
