Primeiro andar
Como parte das actividades organizadas con motivo da Semana da Facultade de Filoloxía coincidindo coa celebración do patrón, San Isidoro de Sevilla, o centro inaugura este xoves 24, ás 12:00 horas no primeiro andar, a exposición Isidorus relectus, o poder da palabra. Con ela preténdese divulgar o patrimonio da Biblioteca Universitaria exhibindo edicións antigas e modernas e traducións a diversas linguas da prolífica produción isidoriana.
A apertura contará coa presenza da vicerreitora de Política Científica, Pilar Bermejo; o decano da Facultade, Elias J. Feijo; a directora da biblioteca do centro, Pilar Jambrina; a comisaria da exposición, Helena de Carlos, e a vicedecana da facultade de Filoloxía, Elsa González.
Ao rematar o acto, desenvolverase no salón de actos unha mesa redonda para dar a coñecer Isidoro de Sevilla, figura complexa e fundamental, ponte entre o mundo antigo e a Idade Media. As múltiples capas que envolven o personaxe, dende o bispo de Sevilla, estudoso herdeiro da rica tradición do pensamento etimolóxico, ata o santo rescatado en diversas ocasións ao longo da historia peninsular, serán analizadas por tres especialistas nas letras da Tarda Antigüidade: Xosé Carracedo Fraga, Joel Varela Rodríguez e Helena de Carlos Villamarín.
