O Mestrado Erasmus Mundus en Lexicografía EMLex, unha aposta a prol da diversidade lingüística e cultural
O estudantado de primeiro ingreso do Mestrado Erasmus Mundus en Lexicografía EMLex da USC conforma un abano de 23 nacionalidades diferentes, deixando patente a aposta pola diversidade cultural e lingüística da Facultade de Filoloxía da USC.
Estes trazos tamén son unha marca de identidade do corpo docente de diferentes universidades: xunto coa USC conforman o equipo docentes da Károli Gáspár Református Egyetem (Hungría), Friedrich-Alexander-Universität Erlangen-Nürnberg (Alemaña), Ilia State University (Xeorxia), Université de Lorraine (Francia), Universidade do Minho (Portugal), Università degli Studi Roma Tre (Italia) e a Stiftung Universität Hildesheim (Alemaña). A estas oito universidades súmanse outras oito entidades asociadas e os centros de prácticas.
“O traballo realizado por todos os servizos de xestión e administración das universidades que conforman o Consorcio é inxente”, explica o decano de Filoloxía, Elias J. Feijó Torres. Un papel central desempéñao a USC no seu papel de institución líder de todo o Consorcio do EMJM-EMLEX, baixo a coordinación da profesora María José Domínguez Vázquez.