A EPS de Enxeñaría de Lugo, un centro pioneiro na formación práctica do seu alumnado coa oferta de estadías en empresas
A Escola Politécnica Superior de Enxeñaría do campus de Lugo da USC, o centro decano das ensinanzas de enxeñaría no Sistema Universitario Galego (SUG), é pioneira na formación práctica do seu alumnado coa oferta de estadías en empresas e institucións nas que os futuros enxeñeiros e enxeñeiras teñen unha primeira oportunidade para poñer en práctica os coñecementos adquiridos nas aulas.
A primeira convocatoria de prácticas en empresas para o alumnado da EPS de Enxeñaría de Lugo ten as súas orixes no curso académico 1997-1998. Máis de dúas décadas despois, este programa de formación complementaria no que tomaron parte miles de alumnos e alumnas non só ten acreditada a súa sustentabilidade, senón que o esforzo realizado polos sucesivos equipos de dirección do centro universitario lugués permitiu nestes anos favorecer e aumentar a adhesión a este proxecto dun cada vez maior número de empresas, entidades e organismos públicos, que, pola súa actividade ou campo de traballo, resultan destinos acaídos para que os futuros enxeñeiros e enxeñeiras gocen dunha primeira experiencia práctica e coñezan de primeira man a realidade do mercado laboral.
O programa de prácticas externas da EPS de Enxeñaría do campus de Lugo da USC é hoxe en día un proxecto sólido que, ademais do alumnado, ten como protagonistas ás preto de 300 empresas con actividade nos diferentes sectores nos que se forma o estudantado do centro universitario lugués, tal e como o son o sector agrícola e das industrias agrarias, o ámbito forestal e mesmo áreas de traballo estreitamente ligados coa enxeñaría civil e a topografía.
Os convenios de colaboración que mantén na actualidade a EPS de Enxeñaría para o desenvolvemento deste tipo de prácticas son de moi diversa índole, xa que no seu conxunto agrómanse acordos con autónomos, pequenas empresas, cooperativas, empresas punteiras e líderes de negocio nos sectores agrario, agroindustrial, forestal e civil distribuídas por todo o Noroeste peninsular e mesmo concellos, deputacións provinciais e organismos diversos dependentes ou vencellados coa Xunta de Galicia.
A subdirectora de Prácticas Externas e Orientación Laboral da EPS de Enxeñaría da USC, a profesora Rosa Romero, salienta neste senso que este programa de estadías en empresas e institucións constitúe unha actividade recoñecida academicamente, a través da que o alumnado adquire formación práctica e certa experiencia laboral antes de rematar os seus estudos universitarios. “As prácticas son un complemento formativo esencial, pero tamén supoñen unha vía de integración no mercado de traballo e unha oportunidade de darse a coñecer no ámbito laboral”, sinala Romero.
O éxito das prácticas en empresa ofertadas pola Escola Politécnica Superior de Enxeñaría da USC queda reflectido ano tras ano no alto nivel de aceptación que esta actividade ten entre o alumnado, pero tamén no elevado grao de satisfacción que as empresas acolledoras de estudantes en prácticas amosan unha vez finalizadas as estadías. Os indicadores que manexa o centro lugués para garantir a calidade destes programas apuntan cara unha alta valoración alta que nos últimos cursos se sitúa por riba do 8 nunha escala de 0 a 10. Outro factor que corrobora este éxito é que hai estudantes e empresas que prorrogan a súa relación inicial mediante bolsas e contratos laborais, engade Rosa Romero, ao tempo que precisa que a valoración media das empresas receptoras é incluso superior á feita polo estudantado.
A subdirectora de Prácticas Externas e Orientación Laboral da EPS de Enxeñaría da USC entende que o bo funcionamento do programa de prácticas externas do centro, unha iniciativa da que gozaron preto de 230 estudantes no último trienio, é mérito de todas as partes implicadas. Daquela, Rosa Romero fai público o agradecemento do equipo de dirección da EPS de Enxeñarías a todas as empresa e entidades adheridas a este programa, ao tempo que anima a estudantes e a empresas a sumarse a este proxecto acaído para a formación e a inserción laboral das futuras xeracións enxeñeiros e enxeñeiras.