O Museo de Historia Natural da USC celebra o Día Mundial do Hábitat

Con motivo do Día Mundial do Hábitat o vindeiro 2 de outubro, o Museo de Historia Natural da USC ten previsto para este sábado 30 de setembro o obradoiro ‘Galicia, bosques e ríos’. Dirixido a nenos e nenas de 6 a 12 anos, traballaranse de maneira lúdica conceptos como ecosistema, hábitat, nicho ecolóxico ou especie autóctona e invasora, ademais de coñecer as características dos principais hábitats terrestres de Galicia.

Para asistir é preciso cubrir o formulario da páxina web do Museo, o que unicamente implica ter realizada a solicitude. A praza confirmarase por correo electrónico ou por teléfono.