Últimos días para solicitar participar na Orquestra do Espazo de Cámara da USC

A Orquestra do Espazo de Cámara da USC mantén aberta a convocatoria deste curso, á que se pode presentar calquera persoa que saiba tocar un instrumento orquestral, con preferencia os da comunidade universitaria. A admisión quedará supeditada á superación da audición prevista para o martes 3 de outubro ás 21:00 horas na Igrexa da Universidade. De non poder asistir, existe a modalidade non presencial enviando un vídeo.

En concreto, este ano búscanse intérpretes de violín, viola, violonchelo, contrabaixo, frauta, óboe, clarinete, trompas, trombóns, trombón baixo, percusión e harpa. A maiores, farase unha lista de reserva de fagote, tuba e piano. Ademais, existe outra modalidade para formar parte da orquestra: como colaboradores da organización, desenvolvendo un traballo de xestión e aprendizaxe na área de xestión cultural.

Os instrumentistas seleccionados poderán participar no grupo residente que ensaiará todos os martes lectivos (agás período de exames) de 21:30 a 23:30 horas na Igrexa da Universidade.