Remata a cuarta quenda de Verán CampUSC logo de atender a 360 rapaces e rapazas
Verán Campus pecha este venres 29 a primeira parte do seu programa de actividades nas que participaron 360 rapaces e rapazas entre finais de xuño e xullo. A última quenda, o vindeiro mes de setembro, desenvolverase entre os días 1 e 9, estando dispoñibles as últimas prazas libres. Verán CampUSC é un programa de actividades estivais dirixido especificamente a rapaces e rapazas de 3 a 13 anos que organiza a Fundación USC Deportiva para integrantes da comunidade universitaria e tamén para o público xeral promovida pola USC coa colaboración do Concello de Santiago.
Na edición de 2016, incorporouse entre as actividades a colaboración do programa Estalmat de estímulo do talento matemático, así como o percorrido no tren turistico por Compostela. Na derradeira xornada realizarase unha saída por Campus Vida e a Alameda que servirán como escenario de traballo.
Verán CampUSC mestura actividade deportiva, cultural, socioeducativa e de lecer que procura axudar ao proceso de conciliación laboral de familias. Coas propostas programadas amosaranse aos participantes as bases dunha importante cantidade de xogos e deportes atendendo as súas idades e desenvolvemento psíquico-físico. No seu deseño tívose en conta a importancia da práctica físico-deportiva dende o punto de vista da saúde e como mecanismos para inculcar dun xeito lúdico os valores de disciplina, esforzo, perspectiva de xénero, dedicación e respecto ás normas.
Algunhas das actividades que se desenvolverán son piscina, deportes de raqueta e de combate, psicomotricidade, deportes colectivos, sendeirismo, acrosport, xogos predeportivos e populares. Pola súa banda, no capítulo de actividades de ocio e tempo libro inclúense diferentes obradoiros con distintas técnicas e materiais (modelaxe, pintura, recortables, papiroflexia,...) como cancións, xogos cooperativos, visitas a lugares significativos da cidade e do contorno.
