O 14º Encontro Universitario de Danza Contemporánea chega esta semana a Compostela e Lugo

O décimo cuarto Encontro Universitario de Danza Contemporánea da USC, un foro artístico pioneiro en Galicia e dos máis lonxevos do panorama universitario español, terá lugar os días 20 e 21 de abril no Teatro Principal de Santiago coa intención, nesta edición, de dar visibilidade ao traballo propio, unha produción cada vez maior e de probada calidade. O venres 22 e o sábado trasladarase ao Campus de Lugo.

Catorce anos despois da primeira edición, esta modalidade de expresión artística ten acadado unha dimensión transversal entre os membros da comunidade universitaria da institución académica compostelá. A creación e permanencia ao longo dos anos de dúas compañías propias nos campus de Lugo e de Santiago, así como a evolución de dúas formacións nadas ao abrigo da USC que agora comezan a súa andaina de xeito independente dan mostra das fondas raíces trenzadas pola danza na USC.

Programa de Compostela
Nesta ocasión en Santiago participan catro compañías nacidas ao abeiro do Espazo de Danza da USC – DanzaUSCompostela, DanzaUSC-Lugo, e as novas independentes Camiños e Efímero Divadlo– que, baixo a dirección de Juan Carlos Zahera nos campus de Lugo e de Santiago, presentarán distintas producións propias, xunto coa da Compañía de Danza da Universidade de Coruña. A entrada é libre e gratuíta para todas as representacións, previo paso pola billeteira do Teatro Principal a partir das 18.00 horas.

A compañía danza USCompostela xunto coa Orquestra do Espazo de Cámara da USC abrirá o mércores 20 de abril, a partir das 21.00 horas, o programa de representacións coa obra ‘O mesmo océano abrázanos longamente’, unha produción colectiva propia das dúas compañías que colaboran por primeira vez. De seguido, Efímero Divadlo porá en escena ‘Alien’, interpretada e corografiada por Daniel Lazso, e Camiños fará o propio con ‘Desconexión’.

O xoves 21 abrirá de novo a programación a nova produción de USCompostela xunto coa Orquestra da USC para continuar coa compañía da UDC Danza NORMAL e a súa produción ‘Rescate’. O encontro rematará ese día con danzaUSC-Lugo e ‘Tras a pel’.

Encontro de Danza Lugo
O Encontro trasladarase os días 22 e 23 de abril ao Museo Interactivo da Historia de Lugo (MIHL) da capital luguesa, o escenario no que cinco formacións artísticas nacidas ao abrigo da USC (DanzaUSCompostela, DanzaUSCLugo, Compañía Sen Vergoña do IV Ciclo da USC e as compañías independentes Camiños e Efímero Divadlo) presentarán distintas producións propias.

A compañía Camiños abrirá o 22 de abril, a partir das 20.30 horas na caixa negra do MIHL, o programa escénico coa coreografía ‘Desconexión’. De seguido Efímero Divadlo porá en escena ‘Alien’, á que lle seguirá ‘Tras a pel’, a cargo da compañía DanzaUSCLugo.

A compañía danzaUSCompostela xunto coa Orquestra do Espazo de Cámara da USC presentará o sábado 23 de abril, a partir das 20.30 horas, na caixa negra do MIHL a obra ‘O mesmo océano abrázanos longamente’. Logo da intervención desta formación artística, a compañía Sen Vergoña de IV Ciclo da USC representará ‘Tanto en tan pouco’. O encontro de danza rematará cun novo pase da compañía DanzaUSCLugo.