Presentación do I Concurso de Traballos Fin de Grao sobre Enxeñaría e Muller Rural na Escola Politécnica Superior

A Escola Politécnica Superior do campus de Lugo vén de convocar o I Concurso de Traballos de Fin de Grao sobre Enxeñaría e Muller Rural, un certame que ten por obxecto premiar aqueles Traballos Fin de Grao de Enxeñaría Agrícola asinados por alumnas ou que teñan como temática o desenvolvemento de proxectos que melloren as condicións de vida e de traballo das mulleres no medio rural.

O vicerreitor de Coordinación do campus de Lugo, Javier Bueno, o director da Escola Politécnica Superior, Tomás Cuesta; a subdirectora de Calidade e Relacións Externas da EPS, Ana Isabel García Arias; e a profesora María Dolores Fernández Rodríguez, presentarán este mércores, ás 11.00 horas, na sala de xuntas do centro universitario lugués, as bases deste concurso, que está aberto á participación de estudantes dos Graos en Enxeñaría Agrícola da EPS que defendan o seu TFG no curso 2015-2016.