Aberto o prazo de inscrición nos XXIX cursos de verán de lingua e cultura galegas

Ata o 1 de abril permanece aberto o prazo de inscrición na XXIX edición dos Cursos de verán de lingua e cultura galegas ‘Galego sen fronteiras’ que organizan o Instituto da Lingua Galega da USC (ILG), a Real Academia Galega (RAG), a Secretaría Xeral de Política Lingüística e a Deputación Provincial da Coruña. O programa, dirixido a persoas de fóra de Galicia, desenvolverase do 1 ao 22 de xullo de 2016.

Os cursos ‘Galego sen fronteiras’ naceron en 1988 e dende entón permitiron familiarizarse co galego, ou profundar no seu coñecemento, e coñecer a realidade sociocultural do noso país a máis de 2.500 persoas de moi diversas nacionalidades. Polas súas aulas pasaron moitos alumnos e alumnas que hoxe desenvolven un labor destacado no estudo das nosas linguas e literaturas fóra de Galicia, contribuíndo á súa internacionalización e normalización.

Os profesores da USC e membros da RAG Henrique Monteagudo e Xosé Luís Regueira dirixen os cursos acompañados na secretaría académica por Ana Boullón. O programa divídese en tres niveis, elemental, medio e superior, e combina clases teóricas e prácticas, palestras de persoeiros da cultura galega, visitas a lugares de interese natural e histórico de Galicia e outro tipo de actividades culturais e lúdicas.