Entregados os premios dos concursos Compos-3D e Compos-Foto nos que colaborou a USC
O Concello de Santiago acolleu este luns a entrega dos premios aos gañadores dos concursos Compos-3D e Compos-Foto no marco das actividades organizadas con motivo do Día Mundial do Medio Ambiente polo Concello coa colaboración do Instituto de Biodiversidade Agraria e Desenvolvemento Rural da USC (Ibader) e Ferrovial e con soporte técnico de D3MOBILE.
No apartado de centros educativos, o concurso Compos-3D tivo como gañadores o IES Valle-Inclán de Pontevedra e o IES N1 Ribeira, a quen lles corresponderon unha impresora 3D e diploma de recoñecemento, que recolleron as mestras Mª ConsueloBlanco e Margarida Saborido, respectivamente.
Na categoría de mellores equipos, os premios, consistentes en diploma e tabletIpad Air, foron para Roberto Losada e Sergio Gómez, do IES Sofía Casanova de Ferrol, titorizados por Eva Leira; AinhoaEsteban e Raquel Miranda, do IES Valle-Inclán de Pontevedra, coa titora María ConsueloBlanco; e Noelia Nogales, do IES N1 de Ribeira que tivo como titora a Margarida Saborido.
No certame Compos-3D participaron estudantes de entre 14 e 17 anos, tutelados polos seus profesores, que presentaron traballos feitos con instrumentos tan familiares para eles coma un teléfono móbil, unha tablet ou un ordenador. Debían realizar un modelo 3D virtual a partir dun obxecto da súa contorna. Tamén tiñan que elaborar un vídeo do modelo, que podía ser editado.
Compos-Foto
O certame Compos-Foto tivo catro gañadores, que recibiron diploma e cadansúa cámara fotográfica GoPro: Paula del Río, do Colexio Manuel Peleteiro (titora, Silvia Hernández); David Prieta, do IES Ricardo Mella, de Vigo (titor, Francisco Javier del Río); Diana Mascareñas, do Colexio Compañía de María (titora, Isabel Villoch); e Brais Fraga, do CEIP As Fontiñas (titora, Isabel Seoane).
Neste concurso, cada alumno/a, titorado/a polo seu profesor, debía fotografar ou crear unha montaxe fotográfica que se axustara á temática do concurso, o medio ambiente. Podíase participar con calquera dispositivo que permitira tomar fotografías dixitais.
O acto presidírono no Pazo de Raxoi o alcalde de Santiago, Martiño Noriega, e o concelleiro de Medio Ambiente e Convivencia, Xan Duro, e nela participaron ademais o director do Ibader da USC, Pablo Ramil; o responsable da D3MOBILE da USC, Juan Ortiz; e Luis Incera, de Ferrovial.