O grupo Xuvenciencia da USC financia a participación de catro preuniversitarios galegos na Universidade Junior de Porto
O grupo Xuvenciencia do Campus Terra da USC financia a participación de catro estudantes preuniversitarios procedentes de diferentes centros educativos de Lugo, Vilalba, Ourense e Vigo na Universidade Junior de Porto, unha das máis importantes e prestixiosas universidades para nenos e mozos de Europa, con máis de 5.000 participantes cada ano e centos de proxectos cuxa temática abrangue todas as áreas do coñecemento.
O grupo Xuvenciencia da USC reforza así coa súa presenza na Universidade Junior de Porto a colaboración xa comezada hai meses entre dúas institucións que están integradas na rede europea European Children´s Universities Network (Eucu). Antes desta experiencia de intercambio, a colaboración entre o grupo Xuvenciencia e a Universidade Junior de Porto xa posibilitou que catro estudantes portugueses participaran en Lugo desde finais de xuño no Campus de Verán Xuvenciencia 2016 a través doutro programa de intercambio de alumnado. Os catro estudantes galegos que participarán do 8 ao 15 de xullo no programa da Universidade Junior de Porto ‘Verâo em Projeto’, Ana Acosta Veiga, do Colexio Mariano de Vigo; Victoria Díaz Paderne, do IES Santiago Basanta Silva de Vilalba; Adriana Moreiras Blanco, do Colexio Maristas de Ourense, e Darío Pérez Céspedes, do Colexio San José de Lugo, obtiveron praza para gozar desta experiencia na Universidade Junior de Porto no marco do sorteo celebrado na tarde do primeiro de xullo durante a gravación do programa ‘Efervesciencia’, de Radio Galega, nunha sesión emitida en directo desde a sede universitaria luguesa durante a celebración do Campus de Verán Xuvenciencia 2016. Acompañados de profesores e investigadores do grupo Xuvenciencia da USC, que cubre todos os gastos derivados da inscrición e aloxamento, os catro mozos e mozas beneficiarios/as deste programa de intercambio serán recibidos este domingo en Porto por responsables e monitores da Universidade Junior de Porto. Durante a semana, os estudantes galegos, do mesmo xeito que o resto dos participantes neste programa da Universidade Junior, desenvolverán actividades desde as 9:30 ata as 18:00 horas. Unha vez rematada esta quenda de actividades programadas, todas os mozos e mozas estarán acompañados de monitores e responsables da Universidade Junior de Porto e poderán gozar coas distintas actividades de lecer preparadas ata a hora de durmir.