As voces do Coro Gaos soarán este sábado na Igrexa universitaria
As 55 voces do Coro Gaos interpretarán este sábado 28 na Igrexa da Universidade un programa composto por 13 pezas de compositores, case todos contemporáneos, moi diferentes entre elas. O recital, de entrada libre, será ás 19.30 horas.
O repertorio deste sábado, no que actuará como director Fernando Briones, contempla obras de E. Esenvalds, O. Gjeilo, S. Rachmaninov, J. Mäntyjärvi, E. Whitacre, D. Forrest, A. Viñuales, J. Elberdin, J. Gavito, J. Domínguez, L. Jansson e J. Elberdin.
Coro Gaos
O Coro Gaos nace en outubro de 2010 como continuación do proxecto da Orquestra Gaos. O seu repertorio é principalmente “a capella” aínda que tamén ten cabida a música sinfónico–coral, cun especial énfase na ópera. Desde 2011 participa no Festival de Amigos da Ópera, e posteriormente na Tempada Lírica da Coruña, traballando en producións con importantes batutas, directores de escena e cantantes, entre os que destacan os directores de orquestra Gómez Martínez, Ramón Tébar ou Keri-Lynn Wilson; os directores de escena Mario Pontiggia e Alfonso Romeu; e cantantes como Celso Albelo, Gregory Kunde, Juan Jesús Rodrñíguez ou Marianne Cornetti.
En 2014 celebra o V aniversario da Orquestra Gaos coa interpretación da Novena Sinfonía de Beethoven e unha xira por Cataluña na que destaca a súa participación no 49º Festival Internacional de canto coral de Barcelona no Palau da Música así como concertos na Sagrada Familia, a Basílica do Pi ou o Mosteiro de San Cugat.
En outubro dese ano obtén o Primeiro Premio no XIII Concurso Nacional de Corais Antonio José celebrado en Burgos e máis recentemente os segundos premios no XXXII Certame Coral Internacional Vila de Avilés e no XLV Certame Coral de Ejea dos Cabaleiros.
Fernando Briones
Briones é director titular da Orquestra e Coro Gaos desde a súa creación, coa que desenvolve unha intensa actividade concertística acompañando a un gran número de solistas entre os que destacan Cristina Gallardo-Domas, Ainhoa Arteta, Borja Quiza ou Celso Albelo.
Iniciou os seus estudos musicais no Conservatorio Superior de Música da Coruña con Rodolfo García Alonso, onde obtivo o título de guitarra. Estuda composición co catedrático sevillano José Mª Benavente, piano con Xavi Barbeta e dirección de orquestra na ESMUC cos mestres Lutz Köhler e Salvador Brotons.
Completa os seus estudos de dirección coral con Maite Oca, Juan Luis Martínez, Josep Ramon Gil-Tàrrega, Lluís Vila Casañas, Elisenda Carrasco, Joan Company, David Beaven, Javi Busto, Johan Djuick, Laslo Heltay e Martin Schmidt; dirección de orquestra con Salvador Mas Conde e Jörg Bierhance no Wien Universidade Konservatorium e con Donato Renzetti e Darío Lucantoni na Accademia Musicale Pescarese.
Fernando Briones forma parte ademais do proxecto coral da Orquestra Sinfónica de Galicia desde a súa creación dirixindo, entre outros, o Coro Novo co que consegue varios premios en diferentes concursos nacionais.
Actualmente, compaxina a súa actividade coa docencia no Conservatorio Superior de Música da Coruña así como a de pianista repertorista do barítono Borja Quiza.