Un concerto ao vivo do Grupo de Creación Sonora da USC abre este martes o programa dos 8 Sons Creativos na Casa do Saber

O Grupo de Creación Sonora da USC (GCSUSC) abrirá este mércores 3 de maio, ás 20.30 horas, a programación da oitava edición de Sons Creativos cunha intervención en directo no auditorio da Casa do Saber de Lugo. Antes do comezo do concerto, o público presente poderá escoitar obras electroacústicas compostas por Inmaculada Cárdenas, Arturo Vaquero, Mónica Álvarez e Efraim Díaz.

A oitava edición do programa ‘Sons Creativos’, unha plataforma para a difusión e creación sonora organizada desde os seus comezos polo GCSUSC ao abrigo do convenio Lugo Cultural, que recibe financiamento da Deputación Provincial de Lugo, Concello de Lugo e USC, ofrecerá esta semana na capital luguesa un ecléctico repertorio de concertos, audicións, así como obradoiros de electroacústica e arte sonora. Os 8 Sons Creativos ofrecen un ciclo de concertos cun repertorio ecléctico, a través do que se destaca o peso en alza de grupos galegos como o ensemble de música contemporánea Vertixe Sonora, ou o proxecto Voltage Opposites, no que a música electroacústica se funde coa danza e o vídeo. A estas propostas cómpre sumar a dos portugueses Control and Unpredictability, que pecharán este programa o 6 de maio cun concerto ao vivo.

Respecto dos dous obradoiros programados no marco deste ciclo, cómpre lembrar que Arturo Vaquero guiará o mércores 4 de maio, a partir das 16.30 horas, unha sesión práctica de informática musical orientada á creación de paisaxes sonoras. Asemade, a tamén compoñente do GCSUSC Mónica Álvarez guiará o venres 6 de maio, tamén no auditorio da Casa do Saber, un obradoiro co título ‘Dominando a voz, exploración sonora.