O Campus Terra da USC súmase aos actos conmemorativos do Día de Europa coa celebración da xornada ‘Móvete por Europa’

A Vicerreitoría de Servizos Universitarios do campus de Lugo, a través da Área de Orientación e Inserción Laboral campus lugués, organizan o luns 9 de maio, co gallo da celebración do Día de Europa, as xornadas ‘Móvete por Europa’.

A inscrición neste programa informativo e de inserción laboral, que se desenvolverá en quenda de mañá, de 11.00 a 14.15 horas na Aula Universia da Biblioteca Intercentros do Campus Terra da USC, está aberta e é de balde. O aforo é limitado e as persoas interesadas poden formalizar xa a súa matrícula a través do enderezo de correo electrónico emprego.lugo [at] usc.es (emprego[dot]lugo[at]usc[dot]es). Este foro orientado á participación de estudantes e titulados universitarios, pero aberto a todo o público interesado, ten como obxectivo dar a coñecer as oportunidades de emprego, prácticas, formación, bolsas e programas de mobilidade aos universitarios, ademais de dotalos das claves e recursos necesarios para moverse por Europa. A vicerreitora de Servizos Universitarios do campus de Lugo, Carme Silva Domínguez, será a encargada de abrir esta xornada, no marco da que intervirán como relatores técnicos e representantes da Fundación Galicia Europa e da Rede Galega de Dinamización Xuvenil, así como da Rede de Servizos de Emprego en Europa (Eures). A técnico da Área de Orientación e Inserción Laboral do campus de Lugo da USC, Gloria Cruz, e o coordinador do Centro de Linguas Modernas da USC na sede universitaria luguesa, Manuel Fernández, completan a relación de relatores convidados a participar neste foro. A Dirección Xeral de Xuventude, Participación e Voluntariado tamén se suma ás actividades programadas ao abeiro da xornada ‘Móvete por Europa’, coa instalación o luns 9 de maio dunha carpa informativa na entrada da Biblioteca Intercentros.