O reitor Juan Viaño asistiu á reunión do padroado da Rede de Universidades da Eurorrexión Galicia-Norte de Portugal

O reitor da USC, Juan Viaño, asistiu este xoves á xuntanza que o padroado do Centro de Estudios Eurorrexionais Galicia-Norte de Portugal (CEER) celebrou en Vigo e na que participaron tamén os reitores das restantes universidades públicas da Eurorrexión –Vigo, Coruña, Minho, Porto e Trás-os-Montes e Alto Douro– e o director e secretario xeral do CEER. Na reunión aprobouse o plan estratéxico da rede para os vindeiros cinco anos e que ten como misión fundamental contribuír á consolidación do espazo transfronteirizo da ensinanza superior e da investigación na Eurorrexión, promovendo a posta en marcha de titulacións conxuntas de formación e cotutelas en estudos de máster e doutoramento, a mobilidade da comunidade universitaria, o desenvolvemento de posgraos europeos de excelencia e a cooperación con terceiros países. Programa Iacobus Deuse ademais conta na xuntanza dos resultados da primeira e segunda convocatoria do programa Iacobus, que facilitou a mobilidade de 237 membros da comunidade académica da Eurorrexión no curso 2014-2015 cun orzamento de 244.000 euros. As persoas beneficiarias desta iniciativa gozaron dunha bolsa de axuda para unha estancia nun centro de formación superior ao outro lado da fronteira.