Tres alumnas representarán a Galicia na Olimpíada Estatal de Economía

Tres rapazas representarán a Galicia en xuño na Olimpíada Estatal de Economía tras competir onte na sexta edición da fase galega que cada ano ten lugar na Facultade compostelá de Económicas. A primeira clasificada foi Mercedes Diéguez Paniagua, da Compañía de María de Vigo; o segundo posto foi para Amalia Álvarez Vázquez, do IES Isaac Díaz Pardo de Sada; e en terceiro lugar quedou Sara Baamonde González, tamén da Compañía de María de Vigo. A entrega de premios desta edición, a de maior éxito ata agora con 99 estudantes inscritos, tivo lugar este xoves no Concello de Santiago nun acto no que participaron o alcalde Agustín Hernández; o vicerreitor de Internacionalización da USC, Carlos Salgado; o presidente do Colexio de Economistas de Galicia, Miguel Vázquez; a concelleira de Educación, Maite Cancelo; e a decana do centro, Emilia Vázquez.