RedEmprendia reune na USC a vicerreitores de España, Portugal e América Latina en torno á I+D+i e ao emprendemento

Os responsables en temas de transferencia de I+D, innovación e emprendemento de 21 institucións de educación superior de España, Portugal e América Latina asociadas a RedEmprendia reúnense este mércores 15 en Santiago. O encontro de vicerreitores e vicerreitoras das universidades que forman a rede universitaria desenvolverase a partir das 10.00 horas no Centro de Estudos Avanzados da USC (Finca Vista Alegre), e entre as numerosas cuestións a tratar destaca a presentación do documento estratéxico ‘ RedEmprendia Horizonte 2020’ que guiará as accións da rede nos próximos cinco anos e marcará os programas e liñas mestras a desenvolver para apoiar o emprendemento universitario de alto potencial. Na mesma xuntanza, que inaugurará o reitor Juan Viaño, presentaranse o informe ‘Educación Superior en Iberoamérica 2015: A transferencia en I+D, a innovación e o emprendemento nas universidades’ e o da RedOTRI da Conferencia de Reitores de Universidades Españolas sobre investigación e transferencia. Xa pola tarde, o mesmo centro acollerá o seminario ‘O crowdfundig: unha excelente ferramenta para a posta en marcha e financiamento de iniciativas emprendedoras’, impartido por Javier Martín, emprendedor e editor de Loogic.com, portal de referencia en español sobre startups. RedEmprendia RedEmprendia é a rede universitaria máis importante de Iberoamérica orientada á transferencia de I+D e ao emprendemento, que traballa de modo colaborativo tanto para os seus asociados como para dinamizar o denominado Espazo Iberoamericano do Coñecemento. Segundo o seu presidente, o profesor da USC Senén Barro, “as 24 universidades de RedEmprendia, de constituír o sistema universitario dun hipotético país da rexión iberoamericana, serían o sistema universitario máis potente en I+D, innovación e emprendemento da rexión”. Ademais, a rede conta con Banco Santander e Universia, como socios estratéxicos. A continuación do encontro, iniciarase a reunión semestral do Comité Técnico de RedEmprendia que terá lugar no Centro de Estudos Avanzados os días 16 e 17 e reunirá técnicos en investigación e emprendemento de máis dunha vintena de universidades de España, Portugal, México, Chile, Arxentina, Brasil e Colombia, que terán a oportunidade de coñecer o Sistema de Transferencia, Emprendemento e Innovación da institución compostelá.