Un obradoiro virtual da Aula TIC-Pemes da USC sobre Facebook para pemes e autónomos comeza hoxe con 15 persoas inscritas

A Aula TIC-Pemes da USC forma a 15 persoas nas utilidades e posibles vantaxes que pode deparar a rede social Facebook para pemes e autónomos a través dun obradoiro virtual que comeza este venres e que se desenvolverá ata o vindeiro 15 de xuño.

O obxectivo dos promotores desta actividade pasa por contribuír a darlle visibilidade ás pemes e aos autónomos da contorna na rede social Facebook, a través do establecemento dunha relación 2.0 cos clientes actuais e tamén con potenciais usuarios dos seus produtos e servizos. A partir do establecemento desta ligazón inicial, autónomos e pemes poderán traballar na mellora da calidade dos servizos prestados para así potenciar e aumentar as súas vendas.

Este programa formativo, orientado cara a pemes e autónomos, pero aberto á participación de calquera persoa interesada, ten un marcado carácter práctico e inclúe contidos teóricos e titorías virtuais. Está estruturado en 50 horas formativas. O prazo da matrícula neste obradoiro virtual aínda permanecerá aberto nos próximos días, ata completar o total de prazas ofertadas. Para formalizar a inscrición é preciso cubrir este formulario online.

O prezo da matrícula é de 50 euros, aínda que os estudantes e antigos alumnos/as da USC poderán beneficiarse dun desconto do 50% respecto das taxas establecidas.