As bibliotecas da USC abren os festivos do mes de maio

Varios centros da Rede de Bibliotecas da USC permanecerán abertos durante os festivos deste mes de maio. Deste xeito, as bibliotecas Concepción Arenal, a da Facultade de Ciencias Económicas e a Xeral, en Santiago permanecerán abertas este xoves 1 de maio, festivo nacional e o 29 de maio, festivo local en Compostela. Pola súa banda, os usuarios de Lugo poden acudir o xoves 1 de maio á Biblioteca Intercentros. Durante o mes de maio, as bibliotecas da USC manteñen un horario extraordinario por mor do período de exames. As bibliotecas Concepción Arenal, Intercentros e Xeral retrasan o seu peche ata as 3.00 horas da madrugada, comezando ás 8.30 horas durante a semana e abrindo as portas ás 10.00 horas as fins de semana e festivos. Ademais a Sala de Lectura da Facultade de Farmacia permanecerá aberta 24 horas durante todo o mes. Os usuarios dispoñen da conta en Twitter @BUSCHorarios para consultar horarios, centros abertos e nivel de ocupación. A programación extraordinaria das Bibliotecas e salas de lectura da USC, que comezou o pasado luns 21, ten por obxectivo optimizar a oferta de postos adecuándoos á demanda existente. De feito, a Biblioteca Universitaria negociou con representantes do alumnado os centros e horarios de apertura destes, tendo en conta o calendario de exames e a experiencia de anos anteriores. As bibliotecas da USC ofertan 6.593 postos de lectura individuais, abrindo unha media de 226 días ao ano e 74 horas á semana.