Formación do Profesorado lembra os 60 anos da inauguración do edificio coa instalación de paneis fotográficos das obras

A Facultade de Formación de Profesorado do campus de Lugo conmemora a celebración do 60 aniversario da inauguración oficial do edificio que acubilla na actualidade o devandito centro universitario coa instalación de dous paneis fotográficos que reflicten distintas fases do proceso de construción da actual sede universitaria.

As obras de construción do edificio que alberga a Facultade de Formación de Profesorado de Lugo comezaron a principios do ano 1949 coa pretensión de servir de sede para acoller as escolas do Maxisterio e as súas correspondentes Graduadas Anexas. O custo total das novas instalacións, logo de acometer unha ampliación do proxecto inicial levada a cabo en 1952, ascendeu a 15 millóns de pesetas. O arquitecto director das obras foi Francisco Navarro Borrás, sendo Severino Martínez Vázquez o contratista das mesmas. O acto de inauguración deste novo complexo xa inicialmente destinado para usos docentes tivo lugar ás seis da tarde do 8 de setembro de 1954. A sesión estivo presidida polo Ministro de Educación Nacional, Joaquín Ruiz-Giménez, que estivo acompañado, entre outras autoridades, polo Director Xeral de Ensinanza Primaria, Eduardo Canto Rancaño, o Reitor da Universidade de Santiago de Compostela, Luis Legaz Lacambra, e o Secretario do Consello de Educación Nacional, Manuel Fraga Iribarne.