O reitor da USC, Antonio López, presidirá o xurado que avaliará as catro candidaturas que optan ao galardón no marco dunha sesión virtual que se poderá seguir no Facebook de Aresa
O xurado do XXI Premio Aresa de Desenvolvemento Rural, un galardón convocado pola USC e o grupo Aresa, fará público o seu fallo o 22 de marzo nunha sesión virtual que se poderá seguir, a partir das 12.00 horas, na páxina de Facebook de Aresa, no marco da que as catro candidaturas finalistas: EFA Fonteboa, Arnigal Cultivos, Cooperativa A Carqueixa e Estratexia de loita ecolóxica fronte a praga da rata toupa, farán unha exposición de méritos e actividades.
O reitor da USC, Antonio López, actuará como presidente do tribunal encargado de fallar este galardón, dotado cun premio en metálico de 10.000 euros e placa conmemorativa. O presidente de Aresa, Álvaro Rodríguez Eiras; a vicerreitora de Coordinación do Campus de Lugo, Montserrat Valcárcel Armesto; o presidente do Grupo Coren, Manuel Gómez Franqueira, e María José Alonso Fernández, catedrática de Farmacia e Tecnoloxía Farmacéutica da USC, completan a composición do xurado.
O tribunal encargado de avaliar as candidaturas finalistas nunha edición do Premio Area condicionada pola COVID-19 valorará con especial atención as iniciativas que redefiniran o seu modelo de negocio durante a pandemia, así como aquelas que crearan un novo proxecto ou axudasen a outros. Estes méritos sumaranse aos que xa figuran no ADN do Premio Aresa, cuxa finalidade é a de recoñecer entidades, empresas, grupos de investigación, asociacións ou persoas individuais, que contribúen de forma decisiva a crear riqueza nos ámbitos agrícola e/ou gandeiro, xerando postos de traballo de calidade no rural, poñendo en valor os produtos da terra, recuperando subsectores agrícolas e gandeiros tradicionais con potencial para desenvolverse e buscando innovar en produtos e métodos produtivos.
Méritos dos finalistas
O Centro de Promoción Rural-EFA Fonteboa xorde no ano 1975 como unha iniciativa social para dar resposta ás necesidades de formación do medio rural e desde ese ano leva graduado a uns 1.100 estudantes en Formación Profesional Agraria, a maioría dos cales están incorporados a explotacións agrarias e contribúen no fortalecemento do tecido económico e social dos concellos rurais.
Arnigal Cultivos nace da innovación en varias áreas para manter unha produción de Arnica montana constante e necesaria para a súa explotación comercial, pois unha parte importante da flor de árnica utilizada pola industria farmacéutica e cosmética provén da recollida en Galicia. Comezou a súa actividade en febreiro de 2020 coa comercialización dunha gama de tres produtos e coa aposta pola sostibilidade mediante o cultivo ecolóxico, así como a utilización de solventes e tecnoloxías verdes de extracción e a xestión e reutilización de residuos.
A Cooperativa A Carqueixa, ten a súa orixe en 1994, ano no que se fundou para a comercialización conxunta de xatos e a compra de insumos, adquirir máis dimensión como colectivo e conseguir que os produtores de carne de Cervantes fosen un sector máis forte e cohesionado. A día de hoxe está formada por uns 200 cooperativistas.
O proxecto ‘Estratexia de loita ecolóxica fronte a praga da rata toupa’, presentado por Pablo Sánchez Quinteiro, pretende aportar a experiencia dos membros do grupo de Neuroanatomía do departamento de Anatomía da Facultade de Veterinaria da USC no estudo da comunicación química dos mamíferos para o desenvolvemento dunha estratexia de control para este tipo de praga baseándose na utilización de sinais químicos producidos pola propia rata toupa (feromonas) e polos seus depredadores, fundamentalmente o raposo (cairomonas), nas zonas afectadas.