O Departamento de Enxeñaría Agroforestal do Campus Terra, Premio de Transferencia de Tecnoloxía en Galicia

Os Premios de Transferencia de Tecnoloxía en Galicia, outorgados pola Real Academia Galega de Ciencias (RAGC) e a Axencia Galega de Innovación (GAIN) galardoaron na categoría de mellor traballo desenvolvido por un grupo de investigación aplicada o departamento de Enxeñaría Agroforestal da USC en colaboración co enxeñeiro de industrias alimentarias Hiram Varela.

O proxecto premiado pon en valor un residuo gandeiro, o sangue procedente dos matadoiros, a través da súa transformación en fariña de alta calidade cun amplo abano de usos que van dende a fabricación de pensos para animais, fertilizantes agrícolas e aditivos alimentarios ata cosméticos, pegamentos, extintores antiincendios e emulsións asfálticas. O premio está dotado con 6.000 euros e unha axuda doutros 4.000 euros para a formación dun dos investigadores.