Créditos ECTS Créditos ECTS: 4.5
Horas ECTS Criterios/Memorias Traballo do Alumno/a ECTS: 74.2 Horas de Titorías: 2.25 Clase Expositiva: 18 Clase Interactiva: 18 Total: 112.45
Linguas de uso Inglés
Tipo: Materia Ordinaria Grao RD 1393/2007 - 822/2021
Centro Escola Técnica Superior de Enxeñaría
Convocatoria: Primeiro semestre
Docencia: Sen docencia (En extinción)
Matrícula: Non matriculable (Só alumnado repetidor)
Esta materia ten como principal obxectivo darlles a coñecer ás/aos alumnas/os a arquitectura dos sistemas con procesadores que operan de xeito paralelo, dende grandes supercomputadores e servidores, pasando por clústers e incluíndo tamén os multiprocesadores nun chip. Un aspecto fundamental é dar a coñecer os niveis conceptuais e tecnolóxicos que permitan entender a arquitectura dos sistemas actuais e a medio prazo. Outros obxectivos son dar a coñecer a interface coa capa software, e os fundamentos sobre rendemento e eficiencia neste tipo de sistemas.
PROGRAMA
Para a distribución temporal de horas presenciais estimamos 9 horas de clase para teoría, 10 horas para resolución de cuestións e problemas e 18 para prácticas.
TEORÍA
Os catro primeiros temas describen diferentes aspectos hardware dos sistemas paralelos, polo que todos os temas presentan unha importancia semellante. O último tema trata os aspectos do rendemento e eficiencia en sistemas paralelos, que ten unha importancia menos significativa para os obxectivos da materia.
Tema 1: Contexto Tecnolóxico
O tema xustifica a necesidade dos sistemas paralelos, e mostra os diferentes niveis que é necesario estudar neste tipo de sistemas. Poñemos en contexto os conceptos que vamos a estudar mediante unha breve revisión da historia dos sistemas de altas prestacións, e dos datos que se poden obter da lista Top500 (en cada momento contén os 500 supercomputadores máis rápidos do mundo). Introduciremos un modelo simple para predicir a evolución dos nodos de computación na era dos procesadores multinúcleo, e rematamos o tema presentando algúns microprocesadores populares nos sistemas de computación de altas prestacións.
- Sistemas multiprocesador para problemas complexos: exemplos.
- Breve historia dos sistemas de altas prestacións: supercomputadores.
- Evolución dos sistemas paralelos: a lista Top500.
- Arquitectura dos nodos de procesamento: evolución e perspectivas.
- Procesadores comerciais para sistemas de computación de altas prestacións.
Dedicación en horas presenciais: 2 horas.
Tema 2: Topoloxías de Interconexión para Sistemas Multiprocesador
Neste tema iniciamos o estudo ao nivel de rede para a interconexión dos nodos de computación. En concreto estudamos as topoloxías de interconexión para sistemas de altas prestacións e as súas figuras de mérito. A topoloxía da rede é un aspecto fundamental neste tipo de sistemas.
- Buses.
- Redes baseadas en conmutadores.
- Exemplos de redes baseadas en conmutadores con conexións unidireccionais.
- Exemplo de redes baseadas en conmutadores con conexións bidireccionáis e nodos de inxección/extracción.
- Criterios de avaliación para comparación de topoloxías.
- Consideracións tecnoloxicas das canles de interconexión.
Dedicación en horas presenciais: 2 horas.
Tema 3: Arquitecturas Baseadas en Paso de Mensaxes
Neste tema completamos o estudo das redes de interconexión, cos algoritmos de encamiñamento e control de fluxo, o problema dos interbloqueos e a súa eliminación, e a implementación de todas estas técnicas nun conmutador actual para redes de altas prestacións. Outro aspecto importante que abordamos é o da interface coa rede para obter altas prestacións. Completamos a visión dun multiprocesador baseado en paso de mensaxes estudando os fundamentos do seu modelo de programación e un exemplo de interface co programador (MPI). Estudaremos exemplos de redes para clusters por medio da realización dun proxecto.
- Modelo de programación.
- Algoritmos de encamiñamento: determinista, sen información da rede e adaptativo.
- Implementación do encamiñamento: táboas de camiños e algorítmico.
- Control de fluxo: sen buffers (descarte, circuíto conmutado), con buffers de paquete (almacenar-enviar, enviar inmediato), con buffers para flits (burato de verme, canles virtuais).
- Arquitectura dun conmutador para control de fluxo con canles virtuais.
- Interbloqueos: eliminación en encamiñamento determinista e adaptativo. Teorema de Duato.
- Mensaxes de latencia infinita.
Dedicación en horas presenciais: 2 horas.
Tema 4: Arquitecturas Multiprocesador con Memoria Compartida
Neste tema estúdanse os elementos hardware e software que se teñen que engadir a un sistema multiprocesador para facer que o mapa de memoria sexa único (memoria compartida por todos os procesadores). Profundizamos no estudo da implementación dos algoritmos de coherencia cache (xa introducidos na materia Arquitectura de Computadores), e as cuestións de sincronización. Ademais estudamos o modelo de consistencia cache implementado en OpenMP.
- Repaso de algoritmos de coherencia cache: algoritmo MESI.
- Detalles de implementación das variantes MESIF e MOESI.
- Sistemas NUMA con conexións punto a punto.
- Exemplos de implementación industriais.
- Sincronización
- Coherencia en sistemas heteroxéneos e móbiles.
Dedicación en horas presenciais: 2 horas.
Tema 5: Outros Conceptos Relevantes en Arquitecturas Multiprocesador
Este tema introduce os fundamentos teóricos para o estudo do rendemento e eficiencia dos sistemas paralelos. Estes aspectos poden ser útiles para a toma de decisións na configuración de grandes sistemas.
- Ganancia en velocidade (“speedup”).
- Eficiencia.
- Lei de Amdahl. Lei de Gustaffson-Barsis.
- Isoeficiencia. Modelos para predicir a ganancia en velocidade.
Dedicación en horas presenciais: 1 horas.
PRÁCTICAS
PRÁCTICA 1: deseño dun conxunto de programas de proba para medir as prestacións da rede dun supercomputador (Supercomputador Finisterrae do CESGA) e unha rede de estacións de traballo (a da propia aula de informática na que se realicen as prácticas). Tomaremos como referencia o conxunto de programas de proba para comunicacións con MPI de Intel. Os programas estarán escritos en C utilizando a librería de MPI de uso libre MPICH.
PRÁCTICA 2: Simulación de redes de interconexión para multiprocesadores. Simularanse diferentes configuracións utilizando un simulador de uso libre, cambiando a topoloxía da rede, algoritmos de encamiñamento e parámetros asociados ao control de fluxo. Tomaranse medidas de ancho de banda (taxa de extracción da rede) e latencia dos paquetes. O/A alumno/a debe sacar as súas propias conclusións dos experimentos realizados, intentando obter dos datos a maior información posible dun xeito estructurado para caracterizar o comportamento deste tipo de redes.
Dedicación en horas presenciais. Práctica 1: 12 horas. Práctica 2 : 6 horas.
PROXECTOS (equipos de dúas ou tres alumnas/os): deseño dun clúster para computación paralela: análese da capacidade computacional/custo/espazo físico/potencia e software perseguindo o cumprimento dalgún obxectivo de deseño concreto (altas prestacións baixo calquera custo, boa relación custo-prestacións, boa relación custo-potencia, etc). Utilizarase internet para obter os datos dos diferentes compoñentes. Unha das redes analizadas debe ser de altas prestacións para baixa latencia.
Básica:
1- E. Antelo, “Arquitectura dos Sistemas Paralelos”. 2019. Dispoñible electrónicamente para os alumnos da materia.
Este libro está elaborado polo profesor expresamente para esta materia, e será a principal fonte de contidos.
2- www.top500.org.
Sitio web con abundante información de sistemas paralelos. Mantén a lista dos supercomputadores máis rápidos do momento. Referencia básica de información sobre supercomputación e sistemas paralelos.
Complementaria:
2- J. Dally and B.P. Towles, “Principles and Practices of Interconnection Networks”, Morgan Kaufmann, 2004.
Este libro constitúe a fonte fundamental para o estudo de redes de interconexión para redes de altas prestacións. Complementa e amplía abundantemente os contidos da referencia 1 nos contidos dos temas 2 e 3.
3- Patterson e Hennessy, "Computer Architecture. A Quantitative Approach", 6ª Edition, Morgan Kaufmann, 2017.
Referencia clásica nos cursos de arquitectura de computadores, este libro resulta útil para complementar á referencia 1 nos contidos dos temas 1, 4 e 5. O máis interesante para esta materia é o capítulo 4 sobre multiprocesadores e paralelismo multifio.
4- H. El-Rewini et al. "Advanced Computer Architecture and Parallel Processing", Wiley 2005.
Este libro cubre algúns aspectos dos temas 2, 3, 4 e 5, e pode resultar de interese para complementar algúns aspectos da referencia 1.
Contribuír a acadar as competencias recollidas na memoria do título de Grao en Enxeñaría Informática na USC (CG4, CG6, CG9, CG11, TR1, TR2, TR3, FB5, RI1, RI9, RI14, TI2, TI5).
Específicamente:
CG4. Capacidade para definir, avaliar e seleccionar plataformas hardware e software para o desenvolvemento e execución de sistemas, servizos e aplicaciones informáticas, de acordo cos coñecementos adquiridos segundo o establecido no "Acuerdo del Consejo de Universidades del 03/03/2009 para los títulos oficiales en el ámbito de la Ingeniería Técnica Informática".
CG6. Capacidade para concebir e desenvolver sistemas ou arquitecturas informáticas centralizadas ou distribuídas integrando hardware, software e redes de acordo aos coñecementos adquiridos segundo o establecido no apartado 5 do "Acuerdo del Consejo de Universidades del 03/03/2009 para los títulos oficiales en el ámbito de la Ingeniería Técnica Informática".
CG9. Capacidade para resolver problemas con iniciativa, toma de decisións, autonomía e creatividade. Capacidade para saber comunicar e transmitir os coñecementos, habilidades e destrezas da profesión de Enxeñeiro en Informática.
CG11. Capacidade para analizar e valorar o impacto social e medioambiental das soluciones técnicas, comprendendo a responsabilidade ética e profesional da actividade do Enxeñeiro en Informática.
TR1. Instrumentais: capacidade de análese e síntesise. Capacidade de organización e planificación. Comunicación oral e escrita en galego, castelán e inglés. Capacidade de xestión da información. Resolución de problemas. Toma de decisións.
TR2. Personais: Traballo en equipo. Traballo nun equipo multidisciplinar e multilingüe. Habilidades nas relacións interpersonais. Razoamento crítico. Compromiso ético.
TR3. Sistémicas: Aprendizaxe autónomo. Adaptación a novas situacións. Creatividade. Iniciativa e espíritu emprendedor. Motivación pola calidade. Sensibilidade por temas medioambientais.
FB5. Coñecemento da estrutura, organización, funcionamento e interconexión dos sistemas informáticos, os fundamentos da súa programación, e a súa aplicación para a resolución de problemas propios da Enxeñaría.
RI1. Capacidade para deseñar, desenvolver, seleccionar e avaliar aplicacións e sistemas informáticos, asegurando a súa fiabilidade, seguridade e calidade, conforme aos principios éticos e a lexislación e normativa vixente.
RI9. Capacidade para coñecer, comprender e avaliar a estructura e arquitectura dos computadores, así como os compoñentes básicos que os conforman.
RI14. Coñecemento e aplicación dos principios fundamentais e técnicas básicas da programación paralela, concorrente, distribuída e de tiempo real.
TI2. Capacidade para seleccionar, deseñar, desplegar, integrar, avaliar, construir, xestionar, explotar e manter as tecnoloxías de hardware, software e redes, dentro dos parámetros de coste e de calidade axeitados.
TI5. Capacidade para seleccionar, desplegar, integrar e xestionar sistemas de información que satisfagan as necesidades da organización, con criterios de coste e calidade identificados.
Competencias asociadas ao módulo de enxeñería de computadores dentro do grao:
- Coñecemento da arquitectura dos sistemas paralelos e distribuidos tando dende o punto de vista hardware e de implementación como dende o punto de vista da súa programación.
A metodoloxía de ensinanza que empregamos ten por obxectivo que o/a alumno/a participe de xeito activo no desenvolvemento da materia ao longo do cuadrimestre, buscando a máxima interacción co profesor e co resto de compañeiros. Para conseguir este obxectivo propoñemos os seguintes tipos de clases:
- Clases maxistrais: esta serán clases introdutorias para cada tema ao cargo do profesor, no que se fará fincapé nos aspectos máis relevantes do tema, orientando ao alumno nos aspectos fundamentais para a comprensión do tema. Segundo o tema, dedicarase unha ou dúas horas (ver sección de contidos). Documentación: o alumno terá dispoñible na referencia 1 da bibliografía o material necesario para cada tema. O alumno terá coñecemento do calendario de clases maxistrais para que poida realizar unha lectura previa do tema.
- Clases de discusión do test: cada tema levará asociado un test con preguntas cortas, que pretende actuar de elemento motivador para o estudo do tema. Os alumnos deberán entregar o test antes do comezo da clase por calquera dos medios dispoñibles (papel ou electrónicamente). Nesta clase resolveranse as cuestións máis relevantes do test, preferiblemente coa intervención activa dos alumnos. O test estará dispoñible electrónicamente na USC virtual (incluíndo o material externo necesario, como por exemplo algún artigo).
- Clases de problemas: cada tema leva asociado un boletín de problemas. Os alumnos deben entregar os problemas resoltos antes do comezo da clase. Nesta clase resolveranse os problemas máis relevantes, preferiblemente por parte dos propios alumnos. Os problemas estarán dispoñibles electrónicamente na USC virtual (incluíndo o material externo necesario, como por exemplo algún artigo).
- Clases prácticas: os alumnos levarán a cabo as prácticas propostas, no número de sesións indicado para cada práctica. O traballo debe ser autónomo, e individual, buscando interactuar co profesor e o resto de compañeiros para a resolución de dúbidas e verificación de resultados. As primeiras sesións de prácticas estarán dedicadas a unha introdución a MPI, que é necesario para a realización da práctica 1. Combinarán breves explicacións das rutinas máis importantes coa realización de exercicios sinxelos, tanto na aula de informática como no supercomputador do CESGA. O material para estás prácticas, que estará dispoñible electrónicamente, será unha presentación coa explicación das rutinas de MPI, e un tutorial onde se indica paso a paso os aspectos prácticos para poder facer programas con MPI e correlos tanto na aula de informática como no supercomputador. Para a práctica 1, os alumnos terán a súa disposición, electrónicamente , o enunciado da práctica, tempo estimado para realizala e criterios de avaliación. Tamén estará dispoñible a documentación adicional necesaria: documento de Pallas describindo a metodoloxía utilizada no seu conxunto de programas de proba. Para a práctica 2, estará dispoñible electrónicamente o enunciado da práctica, o tempo estimado para realizala e os criterios de avaliación. Ademais estará dispoñible o manual do simulador de redes.
Posto que se espera que o alumno participe de xeito activo, necesitará coñecer con precisión o calendario para cada un dos diferentes tipos de clases. É fundamental que o alumno dispoña de tempo suficiente entre o momento do estudo do tema e as clases que marcan o límite para a entrega do test e os problemas. Como referencia terán como mínimo dúas semanas sempre entre as clases maxistrais dun tema e a corrección do test, e tres semanas antes da corrección dos problemas.
As titorías poderán ser presenciais (en horario de acordo cos alumnos ou segundo o fixe o centro), a través de correo electrónico, ou a través do campus virtual.
Desenvolvemento de competencias:
CG4 e CG6: estas compentencias traballanse integralmente en todas as actividades docentes da materia, na parte específica que atinxe á arquitectura hardware dos sitemas paralelos, con énfase na rede de interconexión de altas prestacións.
CG9: os alumnos traballan esta competencia mediante a realización dos problemas propostos, que logo se poñen en común, compartindo e comunicando os resultados. O proxecto tamén permite traballar de forma extensa esta competencia, xa que o plantexamento é bastante aberto, con moitas solucións posibles. A presentación do proxecto ao resto de compañeiros e ao profesor permite traballar a parte de comunicar e transmitir coñecemento.
CG11: nas clases teóricas facemos un énfase especial no impacto do consumo de enerxía/potencia dos grandes sistemas paralelos de computación. Tamén falamos das aplicacións destes grandes sistemas, que as veces derivan no desenvolvemento de aplicacións de utilidade social cuestionable, e outras en avances científicos que crean riqueza social e económica.
TR1:
Capacidade de análese e síntese: a realización de problemas e cuestións traballan a capacidade de análese. No proxecto trabállase sobre todo a capacidade de síntese. Na primeira práctica traballanse tanto análese coma síntese xa que os alumnos teñen que deseñar un conxunto de programas para facer uns experimentos sobre unha rede de interconexión de altas prestacións, e logo deben interpretar e analizar os resultados. Na segunda práctica, que consiste en utilizar un simulador de redes de altas prestacións, predomina a análese do efecto que ten nas prestacións da rede a variación dos diferentes parámetros.
Capacidad de organización e planificación: as tarefas que se plantexan teñen plazos estrictos de entrega deixando que o alumno teña que organizarse para acadar a planificación requerida, tendo en conta que teñen moitos plazos para outras materias.
Comunicación oral e escrita: os alumnos fan presentacións curtas dos últimos microprocesadores de altas prestacións que saen ao mercado, presentación de problemas e a presentación do proxecto. Para o proxecto teñen que facer unha memoria detallada, para o cal se intercambian ideas para perfeccionar a capacidade de comunicar resultados por escrito. A materia desenvólvese en inglés polo que os alumnos teñen oportunidade de ser activos nesta lingua en todas as facetas de comunicación.
Capacidad de xestión da información: no proxecto hai que xestionar moita información, xa que deben obter de internet todas as especificacións para o deseño dun clúster de computación de altas prestacións, e teñen que indagar na información que dan os fabricantes, que non sempre é sinxela de manexar.
Resolución de problemas: os alumnos deben resolver problemas asociados aos obxectivos da materia. No proxecto deben tamén aplicar esta competencia como parte do proceso de deseño.
Toma de decisións: o proxecto é moi aberto e os alumnos deben tomar decisións xustificadas. A discusión co profesor durante o proceso de realización do proxecto permite ir traballando positivamente esta competencia.
TR2:
Traballo en equipo, habilidades nas relacións interpersoais: o proxecto pode levarse a cabo en equipo. O profesor da unhas pautas para asegurar que os equipos sexan eficientes no desenvolvemento do traballo.
Razoamento crítico: na presentación de proxectos pídeselle aos alumnos que fagan unha crítica de cada proxecto presentado, resaltando os aspectos fortes e febles e con total obxectividade. O profesor modera o proceso para que os estudantes melloren as súas capacidades de razoamento crítico.
Compromiso ético: faise sobre todo énfase na cuestión do plaxio.
TR3:
Aprendizaxe autónomo: as clases teóricas só resaltan os aspectos máis importantes da materia, pero os alumnos están obrigados a profundizar de xeito autónomo para realizar os problemas e o proxecto. As prácticas tamén requiren aprendizaxe autónomo xa que por exemplo para deseñar o conxunto de programas de proba na práctica 1, os al umnos teñen que estudar pola súa conta a especificación da metodoloxía que proporciona un fabricante.
Adaptación a novas situacións. Nalgúns exercicios pídese ao alumno que investigue tendencias tecnolóxicas futuras e adapte os coñecementos adquiridos a estas situacións hipotéticas.
Creatividade, motivación pola calidade e sensibilidade por temas medioambientais: o proxecto é a mellor ferramenta para explotar esta facetas. Os alumnos teñen que ser creativos nas solucións aportadas, que a súa vez teñen que ser de calidade, o cal está reflexado nos criterios de avaliación. Pídeselles aos alumnos que teñan en conta aspectos medioambientais no deseño do clúster de computación.
FB5, RI1, RI9: estas competencias traballanse en todos os aspectos docentes da materia, no que atinxe a sistemas de computación palalelos de altas prestacións.
RI14: a arquitectura dos sitemas paralelos ten unha incidencia fundamental no modelo de programación paralela e distribuída. Faise énfase nas clases teóricas das repercusións dos diferentes aspectos da arquitectura na programación de ditos sistemas e a súa influenza no rendemento. Na práctica 1, os programas de proba permiten avaliar os sobrecostes de comunicación nos sitemas paralelos de altas prestacións, e amósase como esta información é fundamental para o programador.
TI2, TI5: todas as actividades docentes traballan estas competencias, en especial a realización do proxecto e o seu proceso de corrección.
ENXCOMP: "Competencias asociadas ao módulo de enxeñería de computadores dentro do grao:
- Coñecemento da arquitectura dos sistemas paralelos e distribuidos tando dende o punto de vista hardware e de implementación como dende o punto de vista da súa programación."
Esta competencia trabállase de forma intrínseca en todos os aspectos docentes da materia.
Oportunidade ordinaria:
Contribución á nota final e criterios de avaliación (sobre 10 puntos):
- Proxecto: na súa avaliación terase en conta o grado de elaboración do proxecto (opcións comparadas, criterios de selección), obxectivos cumpridos e presentación de resultados, en proporcionalidade ao número de integrantes do grupo que presenta o proxecto (máximo 3). Contribución: 4 puntos. Permite avaliar as competencias: CG4, CG6, CG9, TR1, TR2, TR3, FB5, RI1, RI9, TI2, TI5, ENXCOMP.
- Práctica 1: na súa avaliación terase en conta o número de programas de proba realizado, o grado de elaboración das conclusións do experimento e presentación de resultados. Contribución: 2 puntos. Permite avaliar as competencias: CG4,CG6, TR1, TR2, TR3, FB5, RI1, RI9, RI14, TI2, TI5, ENXCOMP
- Práctica 2: na súa avaliación terase en conta o número de simulacións realizadas, a calidade e elaboración das conclusións das diferentes simulacións e presentación de resultados. Contribución: 2 puntos. Permite avaliar as competencias: CG4, CG6, TR1, TR2, TR3, FB5, RI1, RI9, TI2, TI5, ENXCOMP
- Realización de traballos cortos e problemas: terase en conta na súa avaliación o número de cuestións correctas levadas a cabo en cada test, e problemas resoltos correctamente. Contribución: 2 puntos. Permite avaliar as competencias: CG4, CG6, CG9, CG11, TR1, TR2, TR3, FB5, RI1, RI9, RI14, TI2, TI5, ENXCOMP.
Para superar a materia é necesaria unha puntuación media de 5 ou superior.
Condición para cualificación de non presentado: non presentar ningunha práctica e proxecto.
Os alumnos que non sexan de nova matrícula non conservan notas de cursos anteriores.
Oportunidade de recuperación:
Os mesmos criterios de avaliación que na oportunidade ordinaria.
Condición para cualificación de non presentado: non presentar ningunha práctica e proxecto.
As titorías, a resolución de exercicios e casos prácticos na clase, e as clases prácticas permitiranlle ao profesor coñecer de xeito informal o grao de asimilación da materia que van acadando as alumnas/os ao longo do cuadrimestre.
Con 4.5 créditos ECTS, o traballo persoal do alumno debe ser dunhas 67.5 horas, distribuídas do seguinte xeito:
- Estudo autónomo: 22 horas, dedicadas á asimilacíon dos contidos teóricos.
- Escritura de exercicios, conclusións e outros traballos: 20.5 horas, fundamentalmente dedicadas á preparación dos problemas e exercicios e ao proxecto.
- Programación/experimentación: 10 horas, dedicadas á resolución das prácticas e preparación de resultados para a súa presentación.
- Actividades de avaliación: 15 horas, dedicadas á realización de actividades relacionadas coa avaliación de prácticas, exercicios e proxecto.
A programación da materia tentará que a distribución do número de horas de traballo persoal ao longo do cuadrimestre sexa o máis uniforme posible. A distribución deste esforzo pode variar ao longo do cuadrimestre, en especial na etapa de elaboración e presentación de resultados de prácticas, problemas e exercicios.
Resulta recomendable ter superadas (ou polo menos estudadas) as materias Arquitectura de Computadores e Enxeñería de Computadores, e coñecementos de programación en linguaxe C.
A realización dos exercicios propostos (test e problemas) en paralelo co desenvolvendo dos diferentes temas resulta decisiva para a asimilación dun xeito resolto e ordenado dos diferentes conceptos que se estudan.
Os materiais do curso e as comunicacións electrónicas cos alumnos levarase a cabo coas ferramentas do campus virtual da USC.
A materia “Programación de Sistemas Multinúcleo e Multiprocesadores” constitúe o complemento perfecto desta materia.
Algúns temas e notas de clase están dispoñibles en Inglés.
PLAN DE CONTINXENCIA
No caso de que a situación sanitaria aconselle establecer un Escenario 2 (distanciamento):
1) A ponderación das distintas partes da materia e os requisitos para superar a materia permanecerán inalterados,
2) A proba final realizarase de modo presencial.
No caso de que a situación sanitaria aconselle establecer un Escenario 3 (peche de instalacións):
1) A ponderación das distintas partes da materia e os requisitos para superar a materia permanecerán inalterados,
2) A proba final realizarase de modo non presencial, mediante Microsoft Teams e as ferramentas da aula virtual Moodle.