Ir o contido principal

Traballo de Fin de Máster (TFM)

Neste mestrado o alumnado poderá elixir con flexibilidade tema e director/a, dada a ampla e variada traxectoria do corpo docente.

O TFM proporciónalle ao alumnado a oportunidade de especializarse nunha determinada área dos estudos da literatura e a cultura e permite que este se forme para realizar unha futura investigación a nivel de doutoramento.

1. Obxectivos

Os obxectivos primarios da realización do TFM son: 

  • proporcionar ao alumnado métodos e técnicas básicas e especializadas na investigación literaria e cultural;
  • guiar ao alumnado no proceso de elaboración e defensa dun traballo de investigación;
  • ofrecer ao alumnado a oportunidade de especializarse nun determinado campo dos estudos da literatura e a cultura;
  • preparar ao alumnado para levar a cabo de forma independente unha investigación a un nivel académico axeitado.

 

2. Contidos e desenvolvemento do TFM

2.1. Os contidos do TFM estarán determinados polo tema, área e proxecto de investigación seleccionados por estudante e director/a.

2.2. Bibliografía: será competencia do director/a do TFM subministrar ao/á estudante a información bibliográfica inicial necesaria para o comezo do desenvolvemento do traballo.

2.3. Agárdase que o TFM inclúa ou faga referencia, polo menos, aos seguintes aspectos:

  • obxectivos
  • hipótese de traballo
  • metodoloxía
  • conclusións
  • bibliografía

2.4. O alumnado manterá reunións periódicas co seu director/a nas que se debaterá e decidirá o tema da investigación a desenvolver e a bibliografía inicial e, posteriormente, se analizará e revisará a evolución do traballo, a súa redacción e as súas conclusións.

 

3. Aspectos formais

3.1. Extensión: o TFM terá unha extensión de entre aproximadamente 12.000 e 18.000 palabras.

3.2. Maquetación: marxes de 2,5 cm. (nos catro lados da páxina), espazado de 1,5 liñas e tipografía Times New Roman de 12 puntos.

3.3. Lingua: tanto a redacción como a defensa do traballo poderán facerse en galego ou castelán.

3.4. Estrutura, documentos e declaracións (todos eles dispoñibles na aula virtual de coordinación do mestrado) que debe conter:

  • portada (segundo o modelo dispoñible);
  • documento de delimitación de título e resumo do traballo (o documento aprobado pola comisión académica do MELC);
  • documento de declaración de que o TFM non é un traballo plaxiado;
  • autorización para a difusión do TFM.

Así mesmo, é recomendábel que, tras os devanditos documentos, siga o índice do traballo.

 

4. Tempo de estudo e traballo persoal

O TFM proporciona 15 ECTS, equivalentes a unhas 375 horas de traballo.

Os contidos desta páxina actualizáronse o 03.09.2024.