A nova edición do programa Faíscas Culturais é unha reflexión sobre como as nosas relacións afectivas, tanto políticas como persoais, están transformándose coa aparición dos medios dixitais
Na performance Proxecto RAM o coreógrafo Javier Martín preguntarase pola imaxe do mundo que constrúen as tecnoloxías actuais e como afectan á propia construción dos seres humanos. Este evento é o último dos que forman parte as actividades complementarias á exposición 'Afectos Dixitais'. A entrada é aberta para toda a comunidade universitaria.
O programa Faíscas Culturais é unha iniciativa da Vicerreitoría de Estudantes e Cultura que ten como obxectivo prender a reflexión cultural nas aulas da USC e complementar a formación do estudantado a través de intervencións e actividades de carácter cultural. Baixo o título 'i-Emotions: Afectos Dixitais', esta edición do programa é unha reflexión en torno á exposición 'Afectos Dixitais' sobre como as relacións afectivas, tanto políticas como persoais, están transformándose coa aparición dos medios dixitais.
Sobre a performance
''Mesmo no sono, cando logramos afundirnos no estado no que, como diría Bukowski, o mundo 'inspira e exhala a través do noso corpo', a nosa postura corporal parece expresar a forma fundamental da nosa relación co mundo. Adorno sinalaba que 'a nosa conexión co vento durante o sono revela se somos felices ou non'. A nosa relación co mundo non simplemente se esvaece cando durmimos, senón que segue a operar en ámbitos vexetativos e subliminais.'', explica Javier Martín.
