A USC recoñece 0,2 HDE por cada hora lectiva impartida en galego. Deberase impartir na nosa lingua polo menos un grupo completo de cada tipo de docencia. Así vén recollido no Regulamento de planificación académica aprobado polo Consello de Goberno de 25 de novembro de 2024.
Rexistrar na programación docente a lingua elixida para impartir clases en cada materia e grupo é unha medida que supón un compromiso de transparencia por parte da USC ao tempo que defende os dereitos lingüísticos do profesorado e do alumnado.
Por unha parte, visibiliza e dálle transparencia ao dereito das e dos docentes a empregaren a lingua oficial que elixan nas súas clases (Regulamento de Usos Lingüísticos, art. 7).
Pola outra, permite que o alumnado coñeza información relevante sobre as materias antes de formalizar a matrícula nelas.
Por todo o anterior, a información sobre a lingua da docencia que figura na programación académica é un compromiso vinculante e con valor oficial tanto para o profesorado como para o alumnado. Isto implica que:
- O profesorado debe impartir a súa docencia na lingua que se indica na programación, e o alumnado ten dereito a esixirlle que así o faga.
- O alumnado debe entender que o profesorado non pode cambiar a lingua de docencia que figure na programación, dado o carácter vinculante deste documento.
En consecuencia, é moi importante asegurarse de que na programación de cada materia figura como lingua da docencia aquela que efectivamente se vai empregar. E para iso, a través da Secretaría Virtual do PDI é posible revisar e modificar esa información no período que a Vicerreitoría de Organización Académica e do Campus de Lugo estableza para cada curso.
A revisión e modificación da lingua das materias faise en tres pasos sinxelos.
- Entrar na Secretaría Virtual do PDI e premer en PDA, POD e revisión idioma.
- Na sección Outros cursos seleccionar o curso 2024/2025.
- Na columna "Idioma" (en verde) figura a lingua en que consta que se vai impartir cada un dos bloques de docencia.
Para cambiar a información dun ou varios deses bloques:- Seleccionar no despregable Idioma (en vermello) o idioma en que se quere impartir docencia.
- Marcar nos recadros da columna da esquerda os grupos de clase afectados polo cambio.
- Premer en Gardar idioma.
Este proceso é unha estupenda ocasión para que o profesorado que aínda non o fai, se anime a incorporar o galego como lingua docente. Ao dar ese paso:
- Estáselle ofrecendo ao alumnado un espazo comunicativo que lle permite aumentar a súa capacidade de empregar o galego como lingua profesional.
- Contribúese a que a USC poida acadar o obxectivo establecido polo Claustro de que a finais de 2026 a docencia en galego supoña un 33% da impartida na USC.
- Conséguese acceso preferente a algunhas iniciativas promovidas desde o Servizo de Normalización Lingüística, como formación e a edición de Unidades didácticas e a edición de Esenciais.
- Pódese obter recoñecemento en POD da docencia en galego, tanto para o profesorado que xa a vén impartindo como para quen comece a facelo, segundo se indica no Plan de Accións de Normalización Lingüística aprobado polo Claustro en maio de 2024.