Entrar na universidade é moito máis ca cruzar as portas dun edificio académico. É un renacer. Supón deixar atrás rutinas coñecidas, abrirse a novos mundos, e descubrir quen somos realmente cando se nos dá liberdade para escoller, equivocarnos e aprender. É o inicio dun camiño onde podemos construír unha versión máis auténtica de nós.
Na universidade, non só se cultiva o saber, senón tamén a identidade. É onde se sementan os soños e se regan con esforzo, curiosidade e paixón. É un espazo de transformación, onde cada día é unha oportunidade para reinventarse, para conectar co mundo e para comezar a escribir a propia historia con tinta de futuro.
É o momento de mostráreste outra vez e con forza, é o teu momento de faceres unha universidade máis íntegra e diversa.
Podes vivir na USC en galego
A Universidade de Santiago considera o galego como a súa lingua propia. Os Estatutos da USC recoñecen no seu artigo 3 o galego como a lingua propia da Universidade, e recollen o compromiso da USC de potenciar e garantir, no marco das súas competencias, o uso pleno da lingua galega.
