O CEDE publica un Boletín mensual con seccións fixas e, en certos números, seccións especiais.
O Boletín do CEDE é publicado no final de cada mes.
As seccións fixas inclúen seleccións das noticias máis relevantes, lexislación e sentenzas comunitarias, novidades bibliográficas, estatísticas, convocatorias e oportunidades de financiamento na UE.
As seccións especiais, incluídas ocasionalmente, conteñen entrevistas, comentarios de xurisprudencia e estudos académicos sobre temas da UE.
Subscrición ao Boletín
Para recibir o anuncio de cada novo Boletín do CEDE no seu correo electrónico, pode subscribirse á lista de distribución.
Boletíns anteriores
Os boletíns anteriores están á disposición do público no repositorio Minerva da USC ou cede [at] usc.gal (pedíndoos ao CEDE).
Guía de estilo para as colaboracións
- Tipo de documento: preferentemente .odt (creado co Writer do Libreoffice ou do Openoffice).
- Lingua: preferentemente galego; excepcionalmente en español ou inglés.
- Resumo dunhas cen palabras e até cinco expresións chave (na lingua de redacción e, se esta for diferente, en inglés).
- Estilo de citación: autor-data (sen notas para as citacións, nin de rodapé nin de fin; sen vírgula entre os apelidos dos autores e o ano de publicación).
- Bibliografía final (necesaria debido á ausencia de notas para as citacións), tamén segundo o estilo autor-data. (O estilo de referencia é o da American Political Science Association, APSA, dispoñible en xestores de bibliografías como Zotero, Mendeley e Refworks, e moi parecido ao APA.)
- A primeira palabra dos subtítulos debe levar maiúscula inicial; o título e o subtítulo deben ir separados por ":".
- Nos títulos e subtítulos en inglés, todos os nomes, artigos, verbos e adverbios deben levar maiúscula inicial.
- Non obstante o anterior, debe evitarse un uso abusivo das maiúsculas; por exemplo, a expresión "estado" (ou "state" etc.) irá sempre en minúscula, salvo en contextos especiais (títulos, nomes de institucións etc.), e o mesmo vale para a abreviación "art.", de "artigo".
- Se as notas foren realmente necesarias (por exemplo, para explicacións), as súas chamadas no texto irán sempre despois dos signos de puntuación.
- Ao final das epígrafes nunca se pon punto.
- Unha vez usada unha abreviación, non se voltará a usar a expresión completa.
- Se for abreviada, a expresión "Unión Europea" (ou, en inglés, "European Union", etc.) aparecerá como "UE" (ou "EU", etc.), non como "Unión" (ou "Union", etc.).
- Sempre que for posible, os nomes estranxeiros de cidades, rexións e estados deben ser traducidos (por exemplo, o lugar de publicación na bibliografía).