Segunda edición deste proxecto no que colaboran a USC, o IDIS e a Real Filharmonía de Galicia para analizar como inflúe a música nos xenes
Sensoxenoma é un proxecto de investigación liderado polos profesores da USC Antonio Salas e Federico Martinón no que, por primeira vez e a grande escala, ciencia e música danse a man para loitar contra diferentes enfermidades. Así, o Instituto de Investigación Sanitaria de Santiago de Compostela (IDIS) —constituído ao abeiro dun convenio entre USC, Consellaría de Sanidade e SERGAS —, e a Real Filharmonía de Galicia dan pulo a esta colaboración interdisciplinaria que ten por obxecto “buscar as bases biolóxicas do estímulo musical” coa vontade de “iluminar novas dianas terapéuticas”.
Tras a experiencia inicial desenvolvida en 2022, e que achegou interesantes resultados sobre o efecto da música nos xenes de pacientes con enfermidades neurodexenerativas, o equipo investigador de Sensoxenoma retoma a iniciativa con dous concertos novos concertos en 2023.
No primeiro deles, o día 29 de setembro, tomaranse mostras biolóxicas a persoas xordas, cegas e con trastorno de espectro autista para analizar o efecto da música en persoas pertencentes a estes colectivos. Trátase dun recital restrinxido ás asociacións participantes no estudo, entre as que se contan a Federación de Asociacións de Persoas Xordas de Galicia (FAXPG), a ONCE, ASPANAES e ASPERGA. O director da Real Filharmonía de Galicia, Baldur Brönnimann, levará a batuta dun programa cuxo contido non se coñecerá ata o día do evento.
Ademais, o 30 de setembro, ás 18 horas, celebrarase un segundo concerto no Auditorio de Galicia que xa será de acceso aberto ao público xeral. As entradas poden ser adquiridas na web de Compostela Cultura.