O director do CiTIUS, Senén Barro Ameneiro, impartirá unha nova sesión do ciclo 'Cultura en Mazarelos' na que propón unha reflexión sobre 'Futuro e retos da Intelixencia Artificial', tema da conferencia que impartirá o vindeiro xoves 2 de novembro dentro do ciclo 'Cultura en Mazarelos'.
"Falar do futuro da intelixencia artificial é especular, mesmo de futuros máis ou menos próximos", explica Senén Barro en relación a este conferencia na que revisará as posibilidades da tecnoloxía no futuro. En todo caso, "é tal o seu potencial de transformación social, económica, na educación, sanidade, emprego… que non necesitamos irnos moi lonxe no tempo para imaxinar todo un mundo de posibilidades e tamén de retos que debemos afrontar".
Ademais, das posibilidades, Barro falará da necesidade de mitigar os seus riscos, "falamos dos nesgos que tamén teñen as máquinas, en boa medida herdados de nós; a súa infalibilidade, inevitable cando falamos de intelixencia, sexa artificial ou a nosa; a seguridade, ou máis ben a súa falta; pero, sobre todo, as desigualdades e o desemprego tecnolóxico que as tecnoloxías intelixentes poden amplificar. O que si é evidente, é que non poderemos abordar o desenvolvemento da intelixencia artificial nin os retos aos que nos enfronta, se non é desde a multidisciplinariedade".
