O Centro de Investigacións Feministas e de Estudos de Xénero da USC promove este relatorio de María José Rodríguez Jaume ao abeiro do convenio en materia de Igualdade co Concello de Santiago de Compostela
O Centro de Investigacións Feministas e de Estudos de Xénero da USC e o Concello de Santiago promoven unha nova sesión dos Cafés do CIFEX o xoves 8 de xuño das 12.00 ás 14.00 horas na Facultade de Filosofía. A profesora da Universidade de Alacante María José Rodríguez Jaume afondará no concepto de 'innovación de xénero' no contexto de traballo da UE e tamén nas recentes convocatorias de financión de investigación europea, que esixen a inclusión do sistema sexo/xénero no contido das propostas, con independencia da área de coñecemento. Neste senso, o relatorio dará conta dos criterios de avaliación que contempla a Comisión Europea así como os as publicacións que obrigan á inclusión da perspectiva de xénero nas propostas de artigos.
A asistencia é libre ata completar a capacidade da sala.
Cafés do CIFEX
O obxectivo destas sesións divulgativas de periodicidade mensual é a coñecer en sociedade a vitalidade das investigacións en marcha, evitando o ensimesmamento do academicismo ao pór os resultados ao servizo da cidadanía e mostrando, ao tempo, que moitas investigadoras cuxo traballo é coñecido en circuítos especializados son descoñecidas aínda na sociedade galega, que procura referentes noutras xeografías.
Diríxense a un público amplo, que comprende desde profesorado e estudantado universitario galego (dentro e fora da USC) a profesorado de Ensino Medio ou Primario e a variados perfís profesionais de persoas interesadas na perspectiva de xénero e na súa implicación nos últimos avances de coñecemento, con especial atención ás posibilidades de participación dese público nas investigacións posteriores no que se chama ciencia cidadá.