Este xoves 29 de febreiro, co gallo do Día Internacional das Enfermidades Raras, impartirase na Facultade de Bioloxía a partir das 12.00 horas a conferencia 'Proxeria: ter un neno ancián' polo doutor Ricardo Villa Bellosta, especialista nesta enfermidade. A proxeria, tamén coñecida como síndrome de proxeria Hutchinson-Gilford (HGPS, polas súas siglas en inglés), é unha condición xenética autosómica dominante fatal extremadamente rara de envellecemento acelerado en nenas e nenos.
Aquelas persoas que nacen con proxeria adoitan vivir ata a adolescencia ou a vintena. Segundo datos da Fundación en Investigación en Proxeria de Boston (Estados Unidos), no mundo hai 193 nenos e nenas ou persoas adultas novas que viven en 51 países (incluído España) con proxeria. Con todo, nos últimos 20 anos, grazas ao descubrimento da súa causa xenética, fóronse dando importantes pasos que mostran "certa esperanza" nos tratamentos.
Ricardo Villa Bellosta é investigador Ramón e Cajal na Universidade de Santiago de Compostela e investigador principal do grupo Metabolic Homeostasis and Vascular Calcification. O seu laboratorio atópase no Centro Singular de Medicina Molecular e Enfermidades Crónicas (CiMUS) e é grupo emerxente no Instituto de Investigación Sanitaria de Santiago de Compostela (IDIS). Imparte docencia para o departamento de Bioquímica e Bioloxía Molecular. O seu proxecto de investigación foi seleccionado para o programa de mecenado SUMA Valor. Actualmente está a desenvolver un proxecto de investigación sobre proxeria financiado pola Progeria Research Foundation dos Estados Unidos.
