A vindeira xuntanza do Consello de Goberno da USC desenvolverase este 26 de setembro ás 09.30 horas en primeira convocatoria e ás 09.45 horas, en segunda. A reunión terá lugar no Salón Reitoral do Colexio de San Xerome en Santiago e na Sala Multiusos do Edificio Servizos Administrativos/Biblioteca Intercentros en Lugo e servirá para abordar, entre outras cuestións, o Acordo polo que se adapta o Regulamento Electoral Xeral da USC á Lei Orgánica 2/2023, do 22 de marzo, do Sistema Universitario.
A orde do día tamén estará integrada pola proposta de Planificación complementaria de PDI 2025, a asignación a área de coñecemento e servizo de profesorado vinculado, o procedemento de estabilización de persoal investigador con axudas ERC, a asignación de complementos por actividade investigadora de profesorado contratado (sexenios) e o Acordo para o desenvolvemento do proceso extraordinario de encadramento e acceso aos graos da carreira profesional horizontal no ámbito do persoal investigador e do persoal de apoio á investigación da USC.
Tamén se tratarán cursos e memorias de estudos propios, os logotipos das Cátedras institucionais Castelao, Otero Pedrayo e Rosalía de Castro, regulamentos de fin de estudos, a incorporación de persoal investigador do programa Ramón y Cajal a áreas de coñecemento, actualización de tarifas, asuntos económicos e convenios, entre outros aspectos. A orde do día complétase co informe do reitor, así como os das vicerreitoras e vicerreitores, do xerente e da secretaria xeral e unha rolda aberta de intervencións.