Santiago de Compostela
O evento desenvólvese dentro do marco do proxecto de investigación 'Cephs and Chefs', da Comisión Europea
O obxectivo do taller 'Enriquecendo a cadea de valor do polbo' é identificar accións dirixidas a mellorar a sustentabilidade ambiental, social e económica das actividades levadas a cabo polos actores involucrados na cadea de valor do polbo, dende os pescadores ata os comercializadores. Galicia representa un dos principais centros europeos de oferta e demanda deste cefalópodo, e estas pescarías son as máis importantes en termos socio-económicos da pesca artesanal desta comunidade.
O evento está organizado pola Universidade de Santiago de Compostela, coordinado polo profesor Sebastián Villasante, e desenvólvese dentro do marco do proxecto de investigación europeo “Cephs and Chefs” financiado polo programa INTERREG da Comisión Europea.
Contará coa presencia de destacados persoeiros da empresa, produtores, investigadores e representantes de Galicia, Asturias e Portugal. Dende Galicia participan investigadores do CSIC, da USC, armadores das Confrarías de Bueu, Muros e Ribeira, así como empresas comercializadoras de polbo. Dende Asturias asistirán membros do Centro de Experimentación Pesquera do Principado de Asturias e da Federación de Cofradías de Pescadores, así como da Universidade de Oviedo. Tamén formarán parte das discusións expertos en temas mariños da Universidade de Aveiro (Portugal), da ONG World Wildlife Fund (WWF) e do Marine Stewardship Council (MSC).