Os autores dos mellores TFG de Enxeñaría de Procesos Químicos Industriais e Nutrición Humana e Dietética optan a contratos de traballo en Ingapan
A Facultade de Ciencias do Campus de Lugo celebrará este martes 22 de decembro, a partir das 13.00 horas, o acto de entrega de premios do II Certame de Traballos de Fin de Grao (TFG) das titulacións en Enxeñaría de Procesos Químicos Industriais e Nutrición Humana e Dietética.
O decano da Facultade de Ciencias, Francisco Fraga, e os profesores Gerardo Pereira e Jesús Casabiell, en calidade de secretarios dos xurados encargados de valorar os mellores proxectos presentados en Enxeñaría de Procesos Químicos Industriais e Nutrición Humana e Dietética, respectivamente, intervirán nesta sesión, na que tamén estarán presentes representantes dos colexios profesionais e Ana Piñeiro Neira, directora de Recursos Humanos de Ingapan Corporación, empresa que ofrece dous contratos laborais para os gañadores do certame.