O decano Francisco Fraga presidirá o acto, no que tamén participarán representantes dos colexios profesionais e da empresa Ingapan, que ofrece dous contratos laborais aos autores dos proxectos máis valorados
A Facultade de Ciencias do Campus de Lugo celebrará o xoves 27 de xaneiro, a partir das 12.00 horas, no salón de actos José Rodríguez Mourelo, o acto de entrega de premios do III Certame de Traballos de Fin de Grao (TFG) das titulacións en Enxeñaría de Procesos Químicos Industriais e Nutrición Humana e Dietética.
O decano da Facultade de Ciencias, Francisco Fraga, e os profesores María José Vázquez Vila e Jesús Casabiell, en calidade de secretarios dos xurados encargados de valorar os mellores proxectos presentados en Enxeñaría de Procesos Químicos Industriais e Nutrición Humana e Dietética, respectivamente, intervirán nesta sesión, na que tamén estarán presentes a presidenta do Colexio Oficial de Dietistas-Nutricionistas, María González Rodríguez, e o decano do Colexio Oficial de Enxeñeiros Técnicos Industriais de Lugo, Jorge Rivera, ademais de Ana Piñeiro Neira, directora de Recursos Humanos de Ingapan Corporación, empresa que ofrece dous contratos laborais para os gañadores do certame.