Xabier Monteagudo, Serafín González Prieto, Carlos Rodríguez e Rosa Regueiro pechan esta tempada regueifeira o martes 27 de xuño nun debate cuxa temática foi escollida polo público
O programa de debates Regueifas de Ciencia, unha iniciativa promovida pola USC con financiamento da Fundación Española de Ciencia e Tecnoloxía (FECYT), programa a derradeira sesión da tempada 22-23 o martes 27 de xuño, cun faladoiro arredor dos eólicos e a súa relación co medioambiente e a sostibilidade. O tema que centra o debate foi escollido por votación do público na última das sesións celebradas.
O encontro arrancará ás 19.30 horas na Nave de Vidán e contará coas intervencións de Xabier Monteagudo, responsable de Desenvolvemento de Negocio en Galicia de Capital Energy; Serafín González Prieto, presidente da Sociedade Galega de Historia Natural; Carlos Rodríguez, director xeral de Proxectos en Emberiza e asesor ambiental; e Rosa Regueiro, investigadora en Economía Ambiental da USC.
A sesión, de acceso libre ata completar a capacidade da sala, poderá seguirse en liña.
