O Instituto Galego de Física de Altas Enerxías (IGFAE) organiza esta xornada para alumnado de bacharelato
A Masterclass “Física de Partículas coas mans” volve en formato presencial o vindeiro venres 4 de marzo ao Campus Sur da Universidade de Santiago de Compostela. Ata 70 estudantes poderán participar nesta xornada organizada polo IGFAE por oitavo ano consecutivo co obxectivo de dar a coñecer ao alumnado o día a día da investigación en física de partículas e espertar futuras vocacións científicas.
As inscricións xa están abertas para dous estudantes de 2º de bacharelato por centro educativo no seguinte formulario ata as 23:59 do domingo 13 de febreiro. As solicitudes serán atendidas por orde de chegada ata completar capacidade.