Homenaxe ao doutor Antón Beiras García

Baixo o título 'Visibilizando a memoria', a USC promove un acto de homenaxe ao doutor Antón Beiras García que se desenvolverá na Facultade de Medicina o sábado 26 de novembro ás 12.00 horas. Nel participarán o reitor da USC Antonio López, o decano da Facultade de Medicina Julián Álvarez, a subdirectora xeral de Política Lingüística María Lourdes Batán Aira, a tenente alcalde do Concello de Santiago Mercedes Rosón, a coordinadora da Irmandade da Sanidade Galega, Flora Miranda, e Hixinio Beira, fillo de Beiras García.

No acto procederase á descuberta dun busto do homenaxeado no corredor que dá acceso ao despacho decanal do centro.