A iniciativa a prol do fomento da creatividade promovida pola USC ao abeiro do convenio Lugo Cultural e coordinada por Arturo Vaquero mantén aberto ata o10 de novembro o prazo de presentación de propostas acústicas a través do correo electrónico cultura.lugo@usc.gal
O II Certame de Paisaxe Sonora, unha iniciativa a prol do fomento da creatividade promovida pola USC ao abeiro do convenio Lugo Cultural, que recibe financiamento da USC, Deputación Provincial de Lugo e Concello de Lugo, distingue con 1.200 euros propostas acústicas inéditas e orixinais. O prazo de inscrición permanece aberto ata o 10 de novembro no enderezo de correo electrónico cultura.lugo [at] usc.gal (cultura[dot]lugo[at]usc[dot]gal). A presentación dos traballos que concorran a este certame, coordinado por Arturo Vaquero, poderá facerse ata o 10 de novembro, segundo se recolle nas bases do programa, que están accesibles na páxina web de Lugo Cultural.
Esta nova convocatoria artística aberta á participación de persoas maiores de 18 anos admite candidaturas individuais e traballos conxuntos. As persoas interesadas deberán presentar a concurso paisaxes sonoras cunha duración de un a 10 minutos. As persoas responsables da autoría de cada unha das propostas deberán acompañar o audio dun ficheiro explicativo, no que se dea conta do proceso creativo e dos materiais empregados, ademais de achegar unha explicación conceptual da obra.
As distintas candidaturas que concorran ao II Certame de Paisaxe Sonora deben incluír un título, seguido da identidade do autor/autores, que poden remitir as súas creacións a través do enderezo de correo electrónico cultura.lugo [at] usc.gal (cultura[dot]lugo[at]usc[dot]gal).
O xurado deste programa artellado ao abeiro do convenio Lugo Cultural será o encargado de avaliar as distintas composicións e determinar, no seu caso, a proposta con mellor puntuación, que será distinguida co premio Paisaxe Sonora, dotado con 350 euros. Ademais, as candidaturas participantes tamén optarán ao Premio Inmaculada Cárdenas Grupo de Creación Sonora da USC (GCSUS), dotado con 300 euros.
A entrega de premios será nun acto público que se desenvolverá o 22 de novembro de 2023. O público asistente á gala poderá escoller co seu voto a composición galardoada co premio do público, que ten unha dotación de 150 euros en metálico. O xurado do certame ten tamén a potestade de outorgar outros catro premios de 100 euros cada un ás catro composicións mellor valoradas.