Organizado polo CiTIUS da USC e Fundación IDIS
O CiTIUS e Fundación IDIS promoven conxuntamente a celebración do encontro 'Intelixencia Artificial en Medicina: Das Implicacións ás Aplicacións', un evento que se celebrará os próximos 10 e 17 de novembro. As xornadas estrutúranse en distintos paneis temáticos interactivos, cun enfoque multidisciplinar e nun formato híbrido, que integrará tanto asistentes presenciais como a distancia. Nelas exporase un percorrido desde os fundamentos da IA, ata algunhas aplicacións de uso común.
Na actualidade, a Intelixencia Artificial ( IA) é xa, en palabras de moitos expertos «a tecnoloxía cun maior potencial transformador das que se desenvolveron ata a data». O seu papel resulta esencial en múltiples ámbitos da nosa vida diaria, intervindo en todos os sectores de actividade. Entre eles, o campo da medicina é un dos ámbitos nos que máis se está introducindo a IA, e tamén un nos que maiores expectativas está a xerar.
Aínda que o factor humano seguirá sendo imprescindible, o futuro da medicina pasa por unha incorporación constante dos avances tecnolóxicos, e entre eles, moi singularmente, os propios da Intelixencia Artificial. A aprendizaxe automática permite xa en moitos casos realizar diagnósticos con gran precisión, así como detectar patoloxías con escasas marxes de erro. O tándem formado polas tecnoloxías intelixentes e os especialistas nas distintas disciplinas médicas será unha garantía de progreso no porvir da medicina.
A xornada preséntase como unha oportunidade para aprender e poñer en común a estado da arte da Intelixencia Artificial no ámbito da medicina, podendo valorar mellor a realidade, as oportunidades e os riscos asociados á utilización da IA.