A Oficina de Captación Internacional da USC promove este evento para dar a benvida ao alumnado internacional que estudará na USC este curso académico
A Universidade de Santiago de Compostela acolle cada ano a máis de 1.000 estudantes estranxeiros nas súas aulas. Por este motivo, e co obxectivo de dar visibilidade á importante labor de internacionalización da USC, a Oficina de Captación Internacional, adscrita ao Vicerreitorado de Titulacións e Internacionalización, organiza o sábado 24 de setembro no Xardín do Pazo de Fonseca, o International Students Welcome Day, un evento para dar a benvida ao alumnado internacional que estudará na USC este curso académico.
O programa do evento, que se celebrará entre as 12.00 e as 17.30 horas, contará con varias actividades encamiñadas a presentar a universidade compostelá ao novo alumnado, así como distintos aspectos da cultura galega. A xornada dará comezo cunha benvida institucional e a continuación organizaranse actividades de tipo lúdico como dinámicas de grupo para fomentar que o alumnado se coñeza entre sí. Servirase tamén un xantar con diferentes produtos típicos da gastronomía galega.
Asistirán sobre 300 estudantes internacionais procedentes de máis de 35 países.