IV Semana da Economía Social na USC

Do 20 ao 30 de marzo a USC participa a través do Centro de Estudios Cooperativos (CECOOP) nas conmemoracións da Semana da Economía Social cun conxunto de actividades destinadas a presentar ao alumnado entidades da economía galega que operan neste ámbito e resultados de investigación na área. 

O acto central terá lugar o mércores 22 de marzo ás 12.00 horas na AULA B da Facultade de Ciencias Económicas e Empresariais e contará coas intervencións da Secretaria Xeral de Apoio ao Emprego, Traballo Autónomo e Economía Social, Covadonga Toca; da Vicerrectora de Estudiantes e Cultura, Pilar Murias; do decano da Facultade de Ciencias Económicas e Empresariais, Xoán Doldán  e da directora do CECOOP, Maite Cancelo. Durante o acto, o presidente do Foro da Economía Social Galega Celso Gándara explicará ás persoas asistentes en que consiste a economía social e presentará catro entidades centrais do sector en Galicia para que expoñan ao estudantado o seu modelo empresarial: Triwus S. Coop. Galega, representada por  J. Alberto Pouso Ramallo; Lugar da Daveiga SLL, con Xosé Lois Llamazares; Combina Social, Centro Especial de Emprego, na voz de Raquel Alvite e a empresa de inserción laboral Primicias Raiña, da que falará Raquel Freire. 

Trátase dun evento promovido pola Rede Española Interuniversitaria de Institutos e Centro de Investigación en Economía Social  (Red ENUIES) de CIRIEC-España.

Actividades docentes e conferencias 

Á marxe deste acto central, IV Semana da Economía Social na USC inclúe varias actividades ao longo do mes. As sesións de 'A Economía Social da Aula' esténdense do 21 ao 30 de marzo coa participación do profesorado de varias materias dos graos de Economía, Administración e Dirección de Empresas e dobre grao de Dereito e Relacións Laborais que abordará o concepto e cuantificación da Economía Social galega desde o punto de vista da política económica, o dereito do traballo, o desenvolvemento económico e a sustentabilidade ou a econometría, incorporando de forma transversal estes conceptos nas clases interactivas das respectivas materias.

En paralelo, a Escola Técnica Superior de Enxeñaría acolle o 21 de marzo ás 17.00 horas a xornada 'Emprendemento dixital: a Economía Social como modelo empresarial', un encontro que servirá para presentar tres casos de emprendemento en empresas que adoptaron formas xurídicas propias da Economía Social. A sesión desenvolverase na Aula 3 do centro.