Abordarase o desenvolvemento dun sistema de predición de proliferacións algais nos encoros e esteiros
Este xoves 28 de novembro terá lugar no Centro de Estudos Avanzados da USC un obradoiro de debate e presentación de resultados do proxecto AIHABs, relacionado co desenvolvemento dun sistema de previsión de blooms de cianobacterias nos encoros e esteiros. Nel participará o persoal investigador do proxecto AIHABs, que dende o ano 2022 estivo a desenvolver un sistema orientado á previsión de proliferacións algais nocivas mediante o uso da intelixencia artificial.
O evento está organizado polo grupo de Hidrobioloxía da USC que, dirixido polo catedrático Fernando Cobo, participou no proxecto realizando a toma de mostras e datos de campo no encoro de Belesar e no esteiro do río Miño. Tamén participarán, de maneira presencial ou remota, representantes dos grupos de interese, como distintas confederacións hidrógráficas, empresas de abastecemento de auga, etc, de países como España, Portugal, República Checa ou Irlanda. Durante a tarde, representantes do consorcio AIHABs manterán a reunión de preparación da finalización do proxecto.
