O libro El rostro de la consanguinidad, da autoría de Román Vilas, Gonzalo Álvarez e Francisco Ceballos, preséntase este xoves 27 de xuño ás 12.00 horas na Aula Magna da Facultade de Bioloxía. Preside o acto a vicerreitora de Estudantes e Cultura, Pilar Murias, que estará acompañada polos tres autores, así como polo decano de Bioloxía, Jesús López Romalde; o director de Edicións USC, Juan Luis Blanco Valdés, e o director da Biblioteca de Divulgación. Serie Científica, Jorge Mira Pérez.
O volume estuda a consanguinidade tendo en conta as súas dimensións histórica, antropolóxica, filosófica, estética, relixiosa e cultural, e sobre todo abordándoa desde a perspectiva xenética, incorporando os resultados de investigacións realizadas polos propios autores sobre a cuestión.
Creada no ano 2011, a Biblioteca de Divulgación. Serie Científica de Edicións USC acolle textos que, malia seren resultado da máis rigorosa investigación en cada eido, están presentados de forma divulgativa, con exposición amena e áxil, desprovistos de aparato crítico e pensados para o público xeral e non estritamente especialista. Os temas que tratan os volumes abordan aspectos das ciencias naturais ou experimentais que, dentro da súa natural complexidade ou especificidade, poidan ter tamén un interese divulgativo.