Os membros do Instituto da Lingua Galega (ILG) da Universidade de Santiago de Compostela, Elisa Fernández Rei e Xosé Luís Regueira, presentan o 18 de setembro, ás 12.00 horas, na Facultade de Filoloxía da USC o número especial da revista en liña Languages baixo o título New Developments in Galician Linguistics. Os editores estarán acompañados dalgúns autores e autoras deste volume, que ten por obxectivo presentar unha mostra representativa do estado da investigación sobre a lingüística galega, incluíndo estudos con metodoloxías innovadoras e liñas de desenvolvemento recente na lingüística galega. Ademais, móstrase o traballo de persoal investigador de recoñecido prestixio xunto ao de especialistas novos, "como un sinal da vitalidade do campo e das perspectivas de futuro", explican.
A lingüística galega ten unha historia breve, pero nos últimos 50 anos experimentou un desenvolvemento notable. Especialmente nas dúas últimas décadas, iniciáronse novas liñas de investigación e incorporáronse novas metodoloxías, alcanzando un nivel de desenvolvemento comparable ao dos estudos sobre calquera outra lingua no seu contexto, como demostran os once traballos publicados neste número especial da autoría de investigadores e investigadoras de universidades tanto galegas coma foráneas.
